Home Regional Video ta revela pago di 4 miyon dollar na campaña di presidente...

Video ta revela pago di 4 miyon dollar na campaña di presidente Peña Nieto

133

(Univision) Ciudad di Mexico – Luis Alberto De Meneses Weyll, ex-director di e empresa constructor Brasileño Odebrecht a declara dilanti dos fiscal Brasileño cu e Mexicano Emilio Lozoya Austin a solicita un pago miyonario den e prome trimester di 2012 “pa e por posiciona su mes den e comite di campaña” di e candidato presidencial di e tempo ey, Enrique Peña Nieto.

Asina ta resulta di e video di e declaracion oficial di e ex-dirigente, cu te recientemente tabata secreto. Lozoya Austin tabata na e momento di e combersacion miembro di e ekipo di campaña di e candidato di PRI, y despues durante cuatro aña director di e empresa petrolero estatal Pemex.

“El a solicita un reconocimento di cinco miyon dollar. Mi a consulta cu mi lider y mi a indica e potencial cu Lozoya por a representa cu un relacion di confiansa mas estrecho, mas profesional. Mi a sugeri na mi lider pa aproba un bon cantidad pa reconoce e actividad cu e tabata desaroyando. Y asina nos a haci… Mi a bis’e cu nos tabata dispuesto pa contribui cu cuatro miyon pa reconoce, laga nos bisa, e atencion cu el a dedica na nos den e ultimo añanan,” De Meneses ta sigura e fiscalnan André Bueno de Silverio y Daniel Ferebek San Paioma, segun por constata di e video di su declaracion oficial, realisa dia 16 di december 2016 den sede di Procuraduria di Brasil na Guarulhos, estado Sao Paolo.

E video di e declaracion aki a ser obteni pa e organisacion Mexicano Quinto Elemento Lab, como parti di e Red di Investigacion Periodistico Structura, articula pa IDL Reporteros (Peru), y integra pa periodista di La Nación (Argentina), La Prensa (Panamá), Armando Info (Venezuela), O Globo (Brasil) y Sudestada (Uruguay). Quinto Elemento a entrega Univision siete minuut di e grabacion, den cual por observa De Meneses papiando sinta, bisti cu bachi shinishi y camisa blauw, sin dashi y cu bril.

E repercusionnan pa e actual presidente Peña Nieto no ta conoci ainda. Tempo cu el a yega na poder, el a nombra Lozoya director di Pemex. E mes y su abogado a nenga categoricamente na varios occasion di a ricibi algun pago. E ex-dirigente di Odebrecht De Meneses Weyll ta ser investiga pa a parti mas di 3.300 miyon dollar na funcionario di 11 pais, pa haya contracto grandi di infrastructura.