Home Deporte Triatleta perdi den Ironman di Fortaleza, Brasil

Triatleta perdi den Ironman di Fortaleza, Brasil

187

(G1/Globo).- Un atleta cu tabata competi den e di cuatro edicion di e Ironman di Fortaleza a desaparece ayera, diadomingo mainta. E chip di e competidor Genilson Lima, di 48 aña, no a señala su salida di awa den e parti di natacion, y e bicicleta cu e lo a usa pa e siguiente etapa, a keda na e lugar di salida. Esaki di acuerdo cu teniente-coronel Marcus Costa, di e Coordinacion Integra di Operacion Aereo (Ciopaer).

E buskeda a ser haci desde Praia Formosa, den proximidad di hotel Marina Park, te na Barra do Ceará, na costa di e capital estatal, ampliando e area di e prueba di natacion, segun e coronel. E prueba den lama a cuminsa pa 6 or di mainta, y segun calculacion di coronel Costa, mester a finalisa e etapa pa 8:30.

E organisacion di e evento a confirma e desaparecion, pero no tin certeza cu e tabata den awa. Pa e  organizadornan, ta existi e posibilidad cu e homber a desisti di participa na e evento.

Un avion di Ciopaer a bula riba lama entre 9or y 11or di mainta, pero no a localisa e atleta. Un buskeda nobo lo a ser haci pa e avion, durante mainta di diadomingo, cu marea abao. Dos embarcacion di Marina y dos otro di Cuerpo di Bombero tambe tabata buscando e atleta.

E competencia
E salida di e Ironman Fortaleza a tuma lugar pa seis or di mainta, cu un distancia di 1,9 km di natacion,  90 km di ciclismo y 21,1 km di careda na pia. E evento a clasifica 30 atleta pa e Ironman World Championship 2018, programa pa tuma lugar na Mandela Bay, Sur Africa.  E competencia ta tuma lugar pa di cuatro biaha na Fortaleza y a reuni mas di mil atleta di Alemania, Argentina, Bolivia, Brasil, Suiza, Chile, Spaña, Francia, Italia, Hulanda, Panama, Filipinas, Portugal y Estadonan Uni.