Home Local Tele Aruba y FTA a firma documento pa referendum

Tele Aruba y FTA a firma documento pa referendum

120
Anselmo Pontilius

Ayera parti mainta un biaha mas, abogado di Tele Aruba y sindicato FTA a tene un reunion dilanti mediador di gobierno. Na final a wordo produci un documento adelanta pa atende cu e preocupacion y problema cu ta reina cerca e trahadonan di e planta di television nacional aki. A logra fiha e dia, ora y sitio di e referendum pa e trahadonan di Tele Aruba.

Mediador di gobierno, Anselmo Pontilius, a informa cu ambos partido a firma un acuerdo den su presencia. E acuerdo aki ta encera cu e referendum lo tuma luga diabierna 25 di augustus di 3’or te cu 4’or atardi na oficina di mediador di gobierno mes.

Igualmente nan a palabra diferente puntonan y mediador di gobierno a recomenda ambos parti pa nan intercambia nan puntonan di un forma adelanta, pa asina nan por acelera e proceso pa un eventual negociacion di un contracto colectivo (CAO). E proceso aki lo cuminsa formalmente despues di e resultado di e referendum, unda tur cos ta mustra cu FTA lo haya reconocimento di e mayoria di e trahadonan di Tele Aruba. Ta asina cu for di 18 trahadonan cu derecho di voto; FTA a haya 14 formulario di nan. “Si e resultado ta asina e partidonan por bay mesa caba, y nan sa for di adelanta kico ta e puntonan principal cu nan tin cu atende cu ne”.

Ainda e prome fase di 14 dia ta vigente. E ta un fase unda otro sindicato interesa lo por inscribi pa participa den e referendum aki, si e ta mustra e sosten di e mayoria di e trahadonan. E fase aki ta caduca entre 21 y 22 di augustus. Te aworaki no tin mas sindicato interesa di participa den e referendum di Tele Aruba pero e derecho ey ta existi durante e periodo di 14 dia laboral. Sr. Pontilius ta kere cu tanto FTA como Tele Aruba a papia hopi cla riba diferente situacion y keho di e trahadonan cu nan mester atende cu ne. Nan tin cu documenta esaki nan, percura pa atende cu nan y cu eventualmente lo por bira e documento final di e CAO y condicionnan di trabou.