Home Den Mi Cabes Technologia no ta lo unico cu a cambia educacion

Technologia no ta lo unico cu a cambia educacion

30

Mi hendenan! 3 luna mas yiu, 3 luna mas y mi ta riba luga cla pa fiesta y haya un tiki color bek. Ban pami zomer! Awo, ban papia pasobra manera nan ta bisa na Hulandes “Ik heb een appeltje te schilen met jou”.

Wel, mi hendenan na september mi ta haci 24 y mi a propone un meta di traha hopi duro riba crea portfolio na Ingles, mirando cu mi ta skirbi mayormente na Papiamento. En conexion cu esaki mi a puntra dos of tres di mi juffrouwnan na universidad si mi por a entrevistanan. Secretamente, ta paso mi kier a sa mas di nan bida como como educadornan tambe.

Podise tocante nan experiencianan como muhenan den e industria di communicacion, mirando cu hopi di nan ta basta hoben ainda. Leu di tur e amor y cariño cu hopi biaha mi a ricibi di mi juffrouwnan na Aruba, cu kendenan mi por a combersa pa oranan largo. Mayoria di maestro na mi universidad ta seco y distante. Ta hopi suerte bo tin si nan pasa banda dibo den gang y nan puntrabo conbay. Tur cos ta strictly business, den un manera di bisa. Yena cu e curiosidad di kier sa mas di e hendenan cu dia aden dia afo mi ta wak sin sa casi nada di nan, mi a arma mi curason Caribense cu balor y mi a mandanan un email. Pa mi sorpresa nan a bisa cu si y siman pasa mi a entrevista mi juffrouw cu ta duna e curso di corporate reputation.

Mi a prepara tur mi preguntanan, tur nervioso ya cu mi ta asina custuma na entrevista hende di mi mesun cultura minosa si mi ‘carisma’ y mi manera di semper haci wega lo wordo tuma den mesun manera. Wel, cosnan a bay miho cu mi a spera y prome cu mi por a hala rosea e juffrouw a cuminsa menciona cosnan cu normalmente mino ta tuma encuenta. E ta argumenta cu educacion a cambia hopi cu tempo, no solamente pa motibo di technologia, cual no ta necesariamente algo malo. Sino pa algo mas peligroso ainda, cual ta e echo cu awendia estudio ta wordo mira manera un comodidad. E juffrouw ta splica cu ta berdad cu den un manera e studiantenan ta cliente y nan ta paga pa nan educacion. Sinembargo, niun hende tabay dunanan un diploma, nan tin cu traha p’e. E ta comenta cu e ta basicamente manera paga pa bay gym tur luna, bo ta paga pero bo tin cu bay gym y train pa bo ta fit.

Bo tin cu traha p’e. Segun e, hende no ta balora estudio mucho mas, specialmente na Hulanda y esaki ta visibel te hasta den e manera cu studiantenan ta trata maestronan awendia. Awo, e juffrouw aki ta di descendencia Griego y tin paar di aña caba ta duna les na Hulanda. Mi ta supone e echo cu e tambe ta navegando bida den un cultura diferente ta haci cu e tin un opinion basta skerpi. Tin ora mi ta egt sinti tristo pa mi juffrouwnan na Universidad si, pasobra apesar cu hopi ta seco y frieu tin algun cu ta haci nan best pa haci pa haci nan lesnan leuk y interactivo. Sinembargo masha poco e entusiasmo ta wordo corespondi. Hopi hoben tabay universidad sin niun tiki gana di ta eynan y esaki ta haci nan trabou mas duro tambe. E clash cultural ta basta grandi y nan ta pusha nos tur den yen proyecto hunto y no ta tur ora cos tabay bon.

Pero na final di dia, ami ta di acuerdo mi juffrouw si. Hende simplemente no ta balora educacion mas, sin tuma encuenta e echo cu e ta un privilegio. Cu ta hopi hende na mundo, simplemente no tin tur e oportunidadnan cu a nos tin. E ta interesante pa pensa riba con educacion lo mustra aki 10 aña. Pasobra, tin un posibilidad cu tur maestro cu por wordo remplaza cu un computer, lo wordo remplaza.