Home Den Mi Cabes Tanto bal protesta, si bo no ta enfrenta bo propio hypocresia

Tanto bal protesta, si bo no ta enfrenta bo propio hypocresia

1594

NG Yakari.jpg

Mi hendenan! Un siman yena cu pena pa pueblo completo. Dos chikitin a muri pero mi tin confiansa cu nan nombernan tabata poderoso suficiente pa sacudi pueblo pa largo.

Eingelijk, mi kier a skirbi tocante e caso siman pasa caba pero boso mes sa ora e
herida ta fresco bo mester pensa prome ta con bo tabay cuide pa e cura mas lihe. Mi a lesa mil y un status  update, columnanan di otro periodista. Mi a lesa e buki BOA di Rita Zecher – Enahoro cu a bin traha na Aruba como pshyciatra di mucha den un dia. E ta increibel con el a lanta asina duro pa derecho di muchanan cu trauma y el a wordo cori di e isla. Tambe mi a drenta den discusionnan mahos riba Facebook cu hende. Djies pasobra mi a tribi di menciona cu e tabata probabel cu rasa y e situacion financiero di e famia lo a hunga un rol grandi, den e echo cu e maltrato di Roshandrick y Rishandroh a tuma luga pa asina largo. Pakico oracionnan a wordo pidi ora e mucha practicamente no por a hala rosea mas? Esey tabata mi pregunta. Nos tabay nenga cu nan tabata pertenece na in demografico cu semper a wordo ignora? Si of no? E discusion tabata uno intenso pero sikiera e conversacion a tuma luga. Mi ta struggle pa comprende cu hende simplemente no por wak pakico e caso ta bal la pena wordo analysa un poco mas leu. E ta facil pa djies bisa cu e mayornan tabata monster cu a comete un crimen, cual ta berdad. Pero no por descarta tur e factornan cu probablemente a hibanan na comete un monstrosidad di tal magnitud. E morto di e dos babynan ey tabata un fayo hopi collectivo. E ta un domino effect di un problema cu a hiba na otro, cu a hiba na un otro problema y despues a caba cu un crimen. Tur hende ta manifesta y deal cu nan propio trauma na un otro manera. Algun ta busca ayudo, otro ta mata nan mes y otro ta scoge pa mata otro. Mira ki, e mama ta sumamente hoben tambe y segun rumornan tabata tin problema cu adiccion.

Aruba, lo unico cu mi ta carga ta un impotencia enorme. Lagami bisa bo algo, Pasobra aparentemente niun hende ta durf. Pero some friendly reminders, cu nunca bo tabata ken bo kier bisa bo ta awo. Aruba, tin ora bo ta faya mahos y bo tin cu admiti esey tambe.
Bo a bisa bo ta contra abuso di mucha, pero dia e juffrouw a bully e mucha te haci’e suicidal, bo a bay sinta den parlamento bisti na preto paso bo tin cu defende e juffrouw. Bo a bisa bo ta contra abuso di mucha, pero dia bo bon amigo DJ Oz a wordo haya cu un menor bo di ta e mucha mes a busca. Bo a subi Facebook yama tieners pa tefi y bo a dal bo #FreeOZ.Bo a bisa bo ta contra violencia di hende muhe, dia nan a rape e polis femenino y tira e bandi caminda bo a bisa cu e merece paso e ta tefia riba caya y e ta biba slons. Bo a bisa bo ta contra abuso di mucha, pero dia e tata a fliet “Aruba pro pedofiel” tur caminda  pa hende tene en cuenta kico tabata pasando cu su yiunan bo a bisa cu e ta busca atencion y e ta daña bo isla bunita.Y asina bo lo pasa henter bo bida, kibra bou di bo propio hypocresia. Ta riba one happy island bo ta biba. Unda bo ta scoge ken ta merece di ta wordo considera victima. Di berdad bo tin dushi bida.