Home Regional Situacion grave entre pacientnan di epilepsia na Venezuela

Situacion grave entre pacientnan di epilepsia na Venezuela

132

(ElNacional) – Caracas – Na Venezuela por lo menos 60% di e pashentnan di epilepsia a sufri recaida debi na e falta di medicina. E costo di e remedinan anticonvulsivo, si acaso nan logra haya nan, ta di aproximadamente Bs 320.000, un parti mayor di un salario minimo mensual.

Sergio Castañeda ta un hoben di 18 aña. Tempo cu e tabata baby, a informa su mama cu su yiu tabata sufri di epilepsia. A pesar di e esfuersonan di su famia pa e no ripara kico e tabata sufriendo, cu 10 aña el a sospecha cu algo tabata pasando, pa e cantidad di medicamento cu nan tabata dun’e y asina el a descubri cu epilepsia tabata forma parti di su bida.

“E sensacion ora mi ta bay haya atake ta algo horibel, bo no por controla esey. Ta hopi dificil, bo no sa con bo ta bay reacciona,” el a conta reportero di El Nacional Web.

Den nan cas ta biba Sergio y su mama so. Recientemente el a keda desemplea, loke a provoca cu nan a pasa di tres pa dos cuminda diario. Nan ta haci esfuerso cu e unico entrada cu nan tin, pero ta cada biaha mas complica. Cualkier momento un crisis epileptico por cuminsa. Sergio a pasa hasta cinco dia sin tuma su medicacion debi na escasez y aunke e medico ta pidie pa keda trankil, e ta bisa cu rabia y tristesa ta inevitabel. E sa cu e teribel sensacion ey por bolbe, si no tin tratamento corecto.

Di acuerdo cu e Liga Venezolano Contra Epilepsia (Livece), 1,7% di e poblacion Venezolano tin epilepsia y por lo menos 60% di e pashentnan tin recaida debi na falta di medicina.

María Elena López, integrante di e Sociedad Venezolano di Neurologia (SVN), ta indica cu actualmente ta existi un deficit di 90% di medicamento pa persona cu condicion neurologico, entre nan epilepsia.

Den e boticanan surti pa gobierno nacional ta entrega e productonan, pero por pasa cu despues di ta para varios ora den rij, nan ta bisa e personanan cu nan a caba. E falta di cifra oficial y e desinformacion ta otro dos problema cu ta afecta e atencion medico.