Home Eleccion 2017 Si tin 10 miyon disponibel, den unda lo inverti’e?

Si tin 10 miyon disponibel, den unda lo inverti’e?

72

Tur siman nos ta publica e resultadonan di un poll riba un ponencia hunto cu un splicacion neutral di e topico. E poll aki por haya riba nos website BonDia24. com. Den e matrix bo por mira kico e partidonan politico participando den e eleccion 2017 ta vota. Riba nos Facebookpage nos ta publica e videonan di tur partido unda nan ta motiva nan contesta di si of no riba cada ponencia.

Den e actual debate politico no ta falta plan pa haci hopi cos riba tur sorto di tereno. Realidad ta cu nos tin recurso financiero limita. Esey no ta kita cu mester ta posibel redirigi cierto medio financiero, di unda e ta menos efectivo, o deseabel, y por hinca esaki unda nos ta kere cu e lo tin mas efectividad, pa logra loke kier logra. Ban supone cu abo por dicidi riba 10 miyon di e placa aki. Anto kico lo ta bo prioridad?

Nos por supone cu bo kier haci algo cu no ta bon aworaki, y cu ta esencial pa drecha esaki pronto. Por ta algo cu ta existi caba, ta funciona pero no optimal, pero ta esencial pa percura cu e ta bay funciona optimalmente. Por ehemplo, bo ta haya cu mester drecha nos enseñansa. Eyden tin hopi cos di drecha, semper, y bo ta obliga di pone prioridad. Bo ta bay inverti den drecha cos na nivel di Colegio Arubano, cu mas hoben por bay sigui studia afo? Of bo ta duna prioridad na mehora MAVO y nos enseñansa profesional di nivel medio? Of bo ta bisa: nos mester drecha e base prome, nos ta drecha productividad y calidad di enseñansa basico. Nos mester deal cu delincuencia hubenil. Bo kier traha mas y miho prizon pa hoben, o bo ta pone e placa den ‘opvang’ pa hoben na scol, den deporte, arte, etc. Pone mas trahado social den bario pa yuda nan den bida diario? Brinda nan un otro perspectiva na luga di hang out cu esunnan cu ta den problema caba.

Kico ta bo prioridad? Talbes bo ta pensa cu tur esaki ta masha bunita, pero e peligro number un cu nos tin, cu ta menasa nos tur sin distincion politico, religioso o descendencia etnico, ta nos estilo di bida no saludabel, cu ta haci cu na hoben caba nos ta lidia cu malesanan cronico, causando cu hopi di nos ta muri na edad hoben caba. O nos ta logra yega na edad mas halto, pero cu hopi amargura di un bida yena cu medico y hospital. Ban ataca esey prome? Por ta cu bo ta pensa, cu ta miho nos cuminsa cu bay guera contra e situacion economico, unda hopi di nos poblacion tin problema pa yega fin di luna prome cu fin di placa yega. Nos mester inverti den un economia mas prospero, cu trabao bon paga, anto sector publico lo tin tambe mas entrada pa mehora otro aspecto pa nos. Abo, unda bo lo pone bo inversion?