Home Den Mi Cabes Si bo ta nobo den wega, bo no por uza tactica bieu

Si bo ta nobo den wega, bo no por uza tactica bieu

173

NG Yakari.jpg

Mi hendenan, con bay! Mi sa mi ta poco laat pa papia riba e debate, pero no ta mi fout Den Mi Cabes ta sali tur dialuna, dus bear with me un poco. Como un millennial mi a sinta full e anochi atento den sala y na final mi a sali cu un tiki speransa.

Pa prome, un pluimpje pa e organisadonan, e anochi a bay netjes y riba tempo. Entre e timer y e mic cu tabata paga asina e tempo caba, tabata tin bon control riba e beurtnan pa papia. Ta di remarca cu banda di Ricardo Croes su tiramento di shade aki aya, e anochi a bay trankilo. Boso mes sa, mi no ta un hende di conflicto dus e cuenta n’ey di wak hende bringa discuti no ta mi cos. Cosnan ey ta gewoon haci mi nervio sin mester.  Mi no sa si ta pasobra e anochi tabata enfoca riba millennials y e politiconan mas grandi tabata sinti cu nan debe nos respet. Podise tabata e presion di ta un miho ehempel pa e hobennan cu a haci cu nan a comporta

Aunke e preguntanan tabata mas tanto basa riba basicamente things money can fix y cambiamento di ley. Nan no tabata dje malo ey, nan a duna e politiconan basta espacio pa splica nan plan.Mi a comenta  na un amiga di mi, cu mi a sinti falta di preguntanan un poco mas humano cu lo duna di demostra e caracter di berdad di e lidernan. Pero bon, rumor has it cu tin mas debate na caminda.

Di mi parti, locual mas a sorprende mi di e anochi tabata Booshi Wever y su punto di bista progresivo cu e tabata tin. No solamente el a duna un si na matrimonio entre parehanan homosexual pero tambe e tabata e unico politico cu a menciona con colonial nos sistema di educacion ta. Esey ta echt algo di aplaudi mirando cu nos muchanan ta sufri hopi bou di e sistema Hulandes y hopi biaha pasobra nan no ta domina algo riba Hulanda su standard, nan ta wordo considera menos sabi. Esey ta un otro combersacion si.

E guy fam Arends di partido RAIZ a kibra e ijs mesora bisando cu e ta nervioso, cual a haci su tono monotono durante e resto di anochi comprendibel. E typical nice guy cu tabata tin tur hende encanta cu su charm. Pa ta un rookie, nos por bisa cu el a haci un bon trabao para banda di politiconan cu tin hopi mas experiencia cu ne. Señora Lampe di partida Curpa, wel kico nos por bisa. Na un momento nos a cuminsa yam’e Dolores pasobra e ta papia manera cu tin asina un agonia den su curason. I mean, mi sa cosnan ta duro pero señora. Algo si, el a duna e anochi hopi saus cu su personalidad. Tambe tabata tin e master plan di PPA, Otmar cu ta djis Otmar, nos tur sa cu sea lo que sea Otmar ta sabi ora di comunica y claro Evelyn Croes cu aunke al caso y semper a contesta tur pregunta fuertemente cu claridad, a desapunta hopi ora el a bisa no na matrimonio entre homosexualnan. Mi hendenan, hopi di nos millennials ta hopi progresivo den pensamento, nos ta conoci pa ta e generacion di menos racista y menos homofobico cu a yega di existi. Hopi di nos ta pro igualdad y no tin manera di cumpra nos si bo ta contra derecho humano.

Awo, bayendo bek na mi titulo mi kier comenta cu aunke den pasado mi menciona cu hopi di amigonan tabata impresiona cu Ricardo Croes, mas e debate a sigui menos mi tabata para na su banda. Bo no por drenta un wega nobo uzando tactica bieu y segun ami Croes a gasta demasiado tempo puntando dede riba gobiernonan cu a goberna na luga di uza e oportunidad pa ilustra kico su partido tin planea pa nos. Mi a keda warda pa scucha, pero nada. Na su luga e tabata keda tira palabra pa Otmar cu Evelyn y haci bomboshi. E ta pret, entertaining, ta berdad tiki spice no ta mata niun hende.

Pero pa mi, punta dede riba un otro ora bo por enfatisa con un cambio por bin ta masha old politics. Nos a wak nos politiconan ta come otro den parlamento pa añanan largo. Nos a wak nan grita, sapatia haci drama y wak unda nos ta awo. Pues mi no ta mira, con Ricardo Croes su actitud ta di aplaudi. Awo, nos no por nenga cu e tin pueblo su tras, cu e tin nos tur bon studia. Pasobra si bo conoce pueblo di Aruba bo sa cu ta esey nos gusta. Pusha palo bou candela, cu nos ta asocia liderazgo cu un hende cu por bisa kico e ta pensa den un manera directo. Si esey pueblo kier, dal bay. No tin duda cu Ricardo Croes tin un bon cabes riba su schouder, pero e sa actitud.

Mi amigo Elton di partido ABO tabata tin mi cumpra, mi a pensa esaki ta un hende cu ta mustra di comprende bon con un sociedad ta traha. Y mientras tur otro kier a core cera frontera pa combati criminalidad, e ta e unico cu a subraya e situacion economico na Aruba cu ta haci cu nos tin hopi home grown criminals manera e mes a bisa. Pero ja, e tambe tabata contra matrimonio di homosexual pues mi no sa si millennials lo kier kijk esaki door de vingers.

Mi hendenan, speransa tin, ta hopi bon proposicion a bin dilanti durante e debate.

Sea critico, no cambia bo integridad pa un fabor politico.