Home Local Promesa falso di gobierno pa cera dump

Promesa falso di gobierno pa cera dump

24

“Haya mi ta bay di mi cas atrobe paso e huma ta haci mi yiunan malo. Danki ministerMike Eman pa duna Parkietenbos prioridad! Inhalers to breathe toxic air.”

Esaki ta parti di un comentario di e habitante cerca e dump, Anouk Balentina, cu pa hopi tempo caba ta post su comentarionan riba Facebook tocante e molester di dump y e efectonan pa su salud y di su famia. Aña pasa e tambe a post un video unda su yiu homber ta keha cu hopi biaha e no por hunga pafo pa motibo di e molester di e huma. Ambos mucha di e señora ta sufri di un forma di asma, segun e.

E ta haya cu atrobe gobierno ta mustra cuno ta duna e habitantenan di Simeon Antonio nada mas cu ‘promesa falso’ pa e situacion di e dump. Manera conoci prome minister a indica na november aña pasa cu na januari lo cera e dump di Parkietenbos. Despues diferente minister entre otro minister Mike de Meza (medio ambiente) y ultimamente minister Benny Sevinger a declara cu mester un estudio mas profundo con lo soluciona e problema. E solucion mas concreto y riba corto plaso tabata cu Ecotech lo tuma over e parti di procesa e sushi for di Serlimar. Asina na januari di e aña aki gobierno mester a yega na un acuerdo cu e compania priva aki pa nan por cuminsa separa tambe e sushi. Pasobra esaki ta un di e problemanan cu e dump ta pega candela spontaneo.

Serlimar mas tanto no ta separa e sushi, asina lo crea un situacion unda lo forma gas y asina facilmente esaki ta pega candela. Sinembargo Serlimar mes tambe ta pega sushi na candela simplemente pasobra no tin suficiente espacio mas. Cu e acuerdo cu Ecotech gobierno kier a preveni cu e dump lo sigui crece of forsando Serlimar pa pega sushi na candela pa crea espacio. Sinembargo te awor nada a resulta. Riba termino largo gobierno tin e plan pa sanea e dump pero tampoco no ta conoci con leu nan ta cu e destaho pa otorga e trabou aki na un compania.

Mientrastanto habitantenan ta purbando tur manera na diferente instancia di gobierno y tambe na husticia pa un solucion. Un grupo a entrega un file grandi na recherche pa asina bay Ministerio Publico como cu nan ta mira cu gobierno ta kibra ley penal tambe, esta trece e salud di hende den peliger. Tin kehonan tambe entrega na Departamento di Salud, di Medio Ambiente y mas instancia, tambe Serlimar, sinembargo te awor niun a saca un man pa yuda e habitantenan.