Home Editorial Prome 100 dia ta cuminsa mustra pisa

Prome 100 dia ta cuminsa mustra pisa

351

Tur anterior critica a bira tarea…

Di antemano tabata sigur cu e gobierno nobo, si tabata e actual coalicion o un regreso di e gobierno anterior, lo no a haya un situacion facil ni agradabel. Riba tur esey, a bin e sucedido cu e dos criaturanan cu a bira victima di violencia den seno familiar. A haci loke mester haci, anuncia cierto pasonan cu mester tuma pa mehora con e situacion social aki lo bay haya atencion structura di gobierno. Na su debido tempo lo por evalua loke tin haci y si esaki ta suficiente.

Mientras tanto, un gran cantidad di tema ta subiendo mesa, y ta sclamando pa atencion. Un di nan ta e estado den cual e parti antiguo di Bestuurskantoor ta. Nos por corda cu prome cu 2009 tabatin bastante tension pa e rumor di un posibel benta di e edificio cu un empresa hotelero den bisindario. E transaccion no a sigui, pero e tempo ey caba e edificio tabata den un estado bastante malo, loke lo tabata e trasfondo di e eventual benta, pasobra drecha e edificio lo bay costa masha hopi mes. Durante entrada di gobierno nobo na 2009 a haci un happening grandi, cu un cantidad di boluntario ofreciendo nan tempo y trabao pa trece e edificio den un estado aceptabel. Awor nos ta ocho aña mas leu y na e traspaso di e edificio atrobe a bin dilanti e estado deplorabel den cual en todo caso e parti pabao di e edificio ta. Y por si acaso ta pensa cu esaki ta propaganda di e gobierno entrante, esey no ta asina.

Ta Departamento di Obra Publico a raporta na gobierno nobo tocante e problemanan existente den un carta fecha dia 21 di november ultimo, den cual ta duna cuenta di e aspectonan di deterioro, cu lo mester atende. Tin caso di concret putri, dak cu a lek te cu blafon a bin abao, etc. Tambe e vloer di e piso ariba tin problema grandi, cu temor di cu e por cay aden. Riba su mes nada straño, ya cu tur cas y edificio traha cerca di lama na algun momento ta haya problema di salo cu ta penetra for di subsuelo y ta afecta e cement den muraya y fundeshi.  Ta dificil pa tuma un decision otro cu drecha loke mester drecha, ya cu ta trata di un edificio historico cu  tin un balor emocional grandi pa hopi hende. Pero, gastonan grandi cu no tabata previsto y cu mester presupuesta.

Atrobe e asunto di e refineria ta pidi atencion. Manera a bira conoci ultimo dianan, y cu por lesa den e edicion aki, mas di 60 aresto a cay na Venezuela den e top di gerencia di Pdvsa y hasta di e ex ministro di petroleo, Eulogio del Pino, y e presidente Nelson Martinez, nombernan bon conoci den henter e negociacion cu mandatarionan na Aruba di e gabinete anterior, cu a conduci na e acuerdo di rehabilitacion di e refineria. Gobierno ta bisa cu ta actuando contra corupcion, pero e reputacion di Maduro y su hendenan no ta miho. Den e situacion actual practicamente ningun empresa, o persona cu sano huicio, ta kere den haci negoshi cu e actual regimen narco-dictatorial, ni cu e empresa estatal Pdvsa, cu gradualmente ta pasando den man di e elite militar di e pais. Un elite militar cu ta domina caba varios otro sector, ganando miyones cu corupcion, manera por ehemplo e dominio completo cu militarnan tin den importacion y distribuido di cuminda y remedi. Aunke nos a bisa esaki varios biaha caba, nos no ta keda sin bolbe expresa nos preocupacion pa e proyecto na Aruba, principalmente pa e situacion cu e compania estatal, formalmente doño di e refineria, Refineria di Aruba NV, ta aden. Ta tende pa algun tempo caba diferente rumor tocante e placa cu a yega o no a yega pa cuminsa drecha e refineria, y loke por mustra te awor ta parti di e area di hospedahe pa e trahadonan cu mester bin di exterior, nada mas. Asina leu cu nos conocemento ta bay, den e refineria no a haci mas cu inventarisa loke mester haci.

Ademas tin e asunto cayente di e benta si of no di e compania cu ta distribui combustibel na Aruba (FMSA). Segun ta yega na nos oido, ta e beneficionan di e compania aki ta loke ta permiti paga cierto cosnan pa e compania madre, cu ta Refineria di Aruba NV. Ta bira tempo pa nos sa ‘de una vez por todas’ si ta bende o no ta bende e compania estatal aki, y cu ken. Y e motibo principal, banda di simplemente mester por conta cu transparencia, ta cu e situacion financiero di gobierno lo bira ainda pio, si no bende pasobra gobierno anterior a basa su presupuesto ‘color de rosa’ entre otro riba e benta pa Afl. 40 miyon.

Y pa loke ta concerni e situacion di e compania Citgo Aruba, ta bira tempo pa haya sa te unda nan ta cumpliendo cu nan compromisonan pa haya financiamento, pa por evalua si tin algo di realismo den e proyecto, mas ainda den e situacion precario cu e consorcio ta aden.