Home Editorial Presidente Maduro mester un scapegoat

Presidente Maduro mester un scapegoat

210

E problema aki no a caba ainda…

Ta parce cu tras di henter e asunto di e boycott di transporte y comercio cu Venezuela tin hopi mas asunto scondi cu nos por mira actualmente. Despues di e prome anuncio cu lo tabata trata solamente di un paro di tres dia, awor a anuncia cu ta trata di un extension di e medida pa tempo indefini. Esaki por ta indicacion cu e asunto aki no a caba ainda. Aparte di e problema urgente di logra saca tur ciudadano di Aruba cu ta desea regresa nan isla, y e problema di abastecemento di productonan fresco, tin mas asunto pa clarifica.

Un di nan ta atende e asunto di contrabanda, unda en berdad ambos pais tin un responsabilidad, y ta na su luga pa gobierno di Venezuela haya cooperacion den esaki. Si ta berdad cu den pasado recien ya nan a pidi esey caba, pero gobierno di e momento ey no a haci nada al respecto, anto esaki no ta nada mas cu e di tantisimo indicacion cu ta nada bon mes, aparte di organisa evento y fiesta pa nos haya paga, nan tabata haci. No tin otro manera pa resolve e asuntonan aki cu sinta cu autoridadnan Venezolano na mesa y resolve nan.

Pero hasta si finalmente, y ta di spera cu ta dentro di poco, tur cos keda resolvi, mester keda tene cuenta cu gobierno di Venezuela na e momento aki ya ta den e posicion di “de kat in het nauw die rare sprongen maakt.” E presion riba e regimen di presidente Maduro ta birando gigantesco, y semper ora presion interno ta bira grandi, ta busca un algo pafo pa desvia atencion. No cu esey ta bay yuda, pasobra desvia atencion no ta kita e gravedad interno. Y ta ey cu tin un situacion creciendo cu pa ningun di e forsanan politico lo ta controlabel.

Nos a caba di clausura un aña unda e pais aki tabata cana na rand di e abismo. E strategia di oposicion di pone dia tras dia un parti considerabel di hende riba caya den protesta, no a funciona. Mas di cien morto, centenares di preso, y par di mil herido no a cambia nada den e corelacion di poder den e pais. Oposicion a bay lembe nan herida, y gobierno a probecha pa tene eleccion fraudulento y controla pa nan mes, loke a yuda internamente talbes, pero no pafo. E medidanan di gobierno Mericano, cu ademas a haya apoyo di Union Europeo y varios pais Latino Americano, tabatin nan efecto riba financiamento di e regimen y di su industria principal, Pdvsa. Mientras cu e maneranan pa haya divisa den man a cuminsa bira mas dificil, e necesidadnan ta birando mas grandi tur dia, segun cu e aparato productivo di e pais mes ta den un rumbo inevitabel pa abismo.

E pais a yega caba den un fase unda loke oposicion ta haci o laga di haci, no ta asina relevante. E enemigo mas grandi di e regimen comunista a bira awor e situacion economico incontrolabel. No tin produccion pero gobierno si mester placa. Anto nan ta haci exactamente loke varios gobierno a yega di haci y esey ta print placa. Esey ta hiba bo den un tempo relativamente cortico na un hiperinflacion impresionante, cu no ta para tanten no tin suficiente pa cumpra. Y kico cu gobierno haci den e situacion aki, ta resulta negativo. Y ora desesperacion bira grandi, ta cuminsa mira rond si tin hende pa culpa. E conflictonan interno a conduci caba na medida contra e ‘compañeronan’ cu tabata pluma Pdvsa, pero awor ta importante tambe pa busca scapegoat pafo di e pais. Busca problema cu Colombia, e bisiña mas grandi y cu cual tin mas comercio, no ta conveni pasobra Venezuela no por shut down Colombia, pero si Colombia mester cera frontera cu Venezuela, anto lo tin problema grandi. Un bon ehemplo nos tabatin den dianan di Pasco, unda miyones na Venezuela a keda sin nan pernil (cuero di porco) pa por celebra dianan di fiesta di forma tradicional. Y di unda e pernil mester a bin? Di e bisiña grandi, cu den hopi cos ainda ta percura pa abastecemento di Venezuela, via e luganan na frontera manera Cucuta.

Haci fastioso cu e islanan Hulandes ta un bon inicio, pasobra ciere di frontera no tin tanto consecuencia pa Venezuela, no tin abastecemento clave ta bin ni di Aruba, ni di e dos otro islanan. Ademas henter e asunto ta pone Hulanda den un situacion fastioso. Di un banda nan ta obliga caba di vocifera opinion hunto cu e resto di Union Europeo, pero di otro banda nan no tin gana di causa rabia cerca e mandatarionan Venezolano, pasobra na prome luga nan ta corda riba e interesnan economico Hulandes na e pais bisiña. Esey no ta un wega facil, pasobra semper mester percura tambe pa keda na bon cu e oposicion, por si acaso cu mañan ta nan ta sinta den Palacio Miraflores. No ta tipico cu den e dianan aki nos no ta tende nada di loke Hulanda ta haci na Caracas? Ta nan tin embahada, no Aruba… No ta ciudadano Hulandes ta pega na Venezuela?