Home Politica POR: ‘Un sistema di salario di promocion segun prestacion pa maestronan di...

POR: ‘Un sistema di salario di promocion segun prestacion pa maestronan di scol’

273
Lider di partido POR, Otmar Oduber

Entre e pasonan cu POR lo tuma den e proximo periodo di gobernacion pa drecha calidad di enseñansa na Aruba ta figura introduccion di un sistema salarial pa maestronan segun e principio di promocion segun prestacion. Banda di esey, lo implementa un maneho integral pa loke ta facilidadnan, material y ekipo cu scolnan mester tin na nan disposicion pa por duna les na unmanera efectivo.

E sistema salarial pa maestronan basa riba promocion segun prestacion ta encera un sistema uniforme y transparente di evaluacion di funcionamento di e docente a base di un profil di su competencianan. Pa e docente por bin na remarca pa un promocion, mester tin un evaluacion positivo di su funcionamento. E docente cu ta funciona excelente, por bin adicionalmente na remarca pa un bonus.

Den e sistema aki lo pone hopi mas atencion na coaching, recapacitacion y cursonan di motivacion pa maestronan por motiva y inspira alumno, pa stimula e alumno pensa critico y creativo y haci baymento di scol algo “fun” pa e alumno. E mucha mester bay scol cu placer. Tambe lo duna prioridad na upgrading di e nivel di Hulandes di tur docente.

Ademas lo evalua y restructura IPA cu e meta pa sigui mehora e calidad di e instituto aki y percura pa renobacion di cuerpo di maestro. Un posibilidad ta pa integra IPA den Universidad di Aruba. Y por ultimo lo limita e periodo cu un docente por duna les “onbevoegd” na maximo 2 aña.

Lo introduci pa scolnan un base infrastructural minimo, teniendo cuenta cu e cantidad di alumno, pa loke ta material, ekipo y facilidadnan, manera po ehempel cantidad di klaslokaal, cantidad di banki y stul pa cada klas, smart TV, cantidad di laptop, conexion di internet, cantidad di baño, grandura di area di recreacion y grandura di areanan cu sombra. Den e cuadro aki lo promove modernisacion y digitalisacion den nos enseñansa. Lo crea scolnan saludabel cu cantina cu ta bende cuminda saludabel y area di recreacion cu ta brinda oportunidad pa e alumno haci movecion. Ademas lo ehecuta den fase un plan pa instala airco na scolnan.