Home Policial Polis ta busca 2 homber pa tiramento cu 4 morto

Polis ta busca 2 homber pa tiramento cu 4 morto

44

Den e caso tragico unda cuater Curasoleño a perde nan bida na un snack na Berg Altena polis ta buscando dos homber. Ainda nan no a capta e dos persona aki.

Diasabra anochi alrededor di 20.35 polis a bay e snack unda nan a topa cu e cuater homber drumi abou cu herida di bala na diferente parti di nan curpa. Tres di e victimanan tabata den situacion di hopi preocupacion mientras e di cuater victima no tabata duna señal di bida.

For di investigacion preliminar cu polis a realisa na e sitio a sali na cla cu probablemente dos homber a core yega for di den un hanchi na Berg Altena na parti oost di e snack y a los un cantidad di bala riba algun persona cu tabata para na altura di e snack. Ambulance a yega na e sitio y a transporta e tres victima cu urgencia na hospital. Mas laat den anochi polis a ricibi noticia cu alrededor di 22.10’or tur tres victima a fayece como consecuencia di e heridanan di bala cu nan a ricibi.

Victimanan
Elery Zedelkia Harvey Aeneas Jair Cijntje naci na Corsou di 39 aña a fayece na e sitio mes. E otro tres victima cu a muri na hospital ta: Harold Antonio Francisca naci na Corsou di 48 aña; Purcival Delano Brooks tambe naci na Corsou y di 54 aña di edad, Reegi Riedsel Arcangeles Angelista naci na Corsou 32 aña di edad Na e sitio polis a confisca un auto, un motorcycle y otro articulo cu ta di importancia pa e investigacion.