Home Editorial Partido den gobierno no a haci falta den debate

Partido den gobierno no a haci falta den debate

34

Bon oportunidad pa duna informacion
E debate di/pa ‘milennials’ no a bira un evento devalua cu e ausencia di e partido den gobierno. Su ausencia a haci cu a enfoca mas riba loke e partidonan presente tin pensa di haci si nan ta parti di gobierno despues di eleccion na september. Na algun ocasion lider di POR, cu te aña pasa tabata parti di e actual gabinete, a haya critica como tal, pero su persona o a bira e ‘punching bag’ den ausencia di e lider di AVP. Ademas cu el a argumenta cu no ta pornada el a distancia su mes di e partido ey. Y como tal no tin pakico bay defende e maneho general di e partido ey, salvo si tabata trata di e cartera cu e tabatin. Den e sentido aki e ausencia di berdadero confrontacion fuerte a keda atras, pero manera bisa anteriormente, no a sinti esey como un falta. Y esey pa un motibo. Den e introduccion di e diferente temanan di parti di e organisacion, na un manera neutral y obhetivo, a trece dilanti caba e actual situacion, cu e pregunta na e panelistanan kico nan partido lo bay haci pa coregi/remedia e situacion actual.
Manera tabata di spera, e contestanan a keda un poco colga den observacion general, sea pa falta di conocemento, o pa no revela na e momentonan aki caba kico e partido tin pensa di haci mas specificamente. Asina den e caso di problematica di debe publico, no por a scucha detayadamente kico tin pensa di haci pa reduci debe, aunke cu e deseo di yega na un entendimento cu Hulanda pa por reduci gasto di interes tabata bastante general. Riba e tema di enseñansa nos ta observa cu e atencion no ta bay suficientemente den direccion di e problema di fondo den enseñansa basico, cu tampoco den e ultimo ocho aña aki a haya debido atencion. Aki e raiz di e problema ta, cu consecuencia negativo den tur tipo di enseñansa mas avansa. No a scucha tanto observacion con pa atende e problema fundamental aki.

Un di e oportunidadnan perdi tabata den e tema di ‘good governance’, unda cu nos a anticipa cu lo a bin cu dos aspecto importante, corupcion den gobernacion, y relaciona cu esey e asunto di integridad. Lamentablemente a scoge pa e aspecto di ‘overtolligheidspool’ cu realmente ta un problema relativamente chikito, compara cu e problema grandi di e par di mil cupo di trabao di mas den gobernacion. E falta di e ‘checks and balances’ interno den e departamentonan, na e momento aki ta parce nos un menasa hopi mas grandi cu e 100 y pico hende cu ta sinta na cas. Loke en todo caso si a bin dilanti di banda di UPP, ta e idea pa saca nombramento di empleado publico for di man di e politiconan, y pone esaki cerca un instancia independiente, mara na plan aproba di personal necesario pa cada departamento. Lo ta bon si por elabora mas riba e tipo di idea aki.
Finalmente, tabata un bon escogencia di e organisacion pa no bay riba e tema di marihuana/cannabis, loke a scapa nos di un discusion inutil, mientras cu tur hende ta haci un bon distincion entre cannabis pa uzo medicinal o pa placer.

Y naturalmente e aspecto di con e politiconan a actua individualmente, con nan den nos concepto a impresiona e publico den sala y na cas. Impresion di mayoria di esunnan entrevista despues tabata cu e lidernan di MEP y POR tabata esunnan cu mas a resalta. Den e sentido aki nan actuacion no tabata asina aleha di esun den e debate di Camara di Comercio. E lider di partido RED a logra capta atencion cu un toke humoristico, pero ta parce nos cu mas ‘substance’ na final di dia lo mester por mustra mas fructifero. Al fin y al cabo, politico ta un ‘tough business’ unda bo no ta haya nada regala. Atrobe el a trece dilanti e plan di su partido di bay dedica 10% di GDP na enseñansa, algo totalmente irealistico y cu ta zona mescos e partidonan ‘tradicional’ cu e ta critica. Enfoca riba metanan cu un grado mas halto di realismo lo por yuda hopi.

Por ultimo, pa regresa na e panorama politico general, por bisa cu e contenido informativo tabata bon. Ausencia di e partido den gobierno no a stroba ningun momento, y loke e partido ey tin di bisa nos, nos ta haya diariamente caba via tur medio di comunicacion. E opinion hopi scucha cu e ausencia di e partido ta bay costa nan voto, no ta algo cu ta convence nos sin mas. ‘Hay que ver.’ No por bisa tampoco cu e evento ta un bon manera pa midi con e situacion general di escogencia politico ta actualmente. Nos tin un saludabel miedo pa confia den cualkier tipo di encuesta y otro supuesto señal di apoyo pa tal o cual partido. Cu mas di dos luna ainda pa dia di eleccion, tin hopi factor cu por influencia resultado electoral fundamentalmente. Tin hopi cos cu por sucede prome cu 22 di september.