Home Eleccion 2017 Parehanan LGBT mester haya derecho pa casa na Aruba?

Parehanan LGBT mester haya derecho pa casa na Aruba?

122

Tur siman nos ta publica e resultadonan di un poll riba un ponencia hunto cu un splicacion neutral di e topico. Den e matrix bo por mira kico e partidonan politico participando den e eleccion 2017 ta vota. 


Despues di un debate fuerte, a yega recientemente na aprobacion den parlamento di e cambionan den nos Codigo Civil, cu tabata encera e reconocimento di e relacion di un pareha di persona di mesun sexo, den forma di registro oficial di esaki. Cu e aprobacion aki, esunnan cu ta pertenece na e gruponan internacionalmente conoci bao di LGBT (Lesbian, Gay, Bisexual y Transgender) a keda contento. Pero no completamente pasobra e meta final ta pa yega na reconoce e posibilidad di matrimonio civil pa pareha di mesun sexo, loke no tabata inclui den e cambionan cu a aproba.

* E partidonan aki no kier scoge

Lo ta logico cu den e actual campaña electoral esunnan cu ta apoya e posicion aki, lo sali en busca di e politiconan cu ta di acuerdo y ta dispuesto pa carga nan lucha hiba na e siguiente nivel, cu ta e logro di legalisa matrimonio civil pa pareha di mesun sexo. Di otro banda, esunnan cu ta opone e desaroyo aki, cu mayoria a base di filosofia religioso ta rechasa e posibilidad di reconoce e tipo di relacion aki, tampoco lo sinta keto y lo tuma e oportunidad di eleccion na september proximo, pa trata di convence partidonan politico cu nan punto di bista mester haya atencion y cu, dependiendo di e contesta, nan voto por bay pa esunnan cu ta apoya nan den e defensa di nan opinion. Pa e partidonan politico, esaki no ta bay ta un tema facil pa maneha. Durante e votacion den Staten riba e cambio di Codigo Civil cu a haci registracion di partnership di pareha di mesun sexo posibel, a sali na cla cu e division entre esunnan pro y contra ta core meymey di e dos partidonan grandi.

Ta improbabel cu a bin cambio den esey, loke ta dificulta tuma e siguiente paso, y sigur pa duna cara prome cu eleccion. Sin embargo, e ta un punto di debate cu ta bay mas leu cu e peso relativo di e comunidad LGBT mes. Mientras cu como grupo talbes e no ta representa un peso electoral asina grandi, esunnan cu tin un opinion apasiona pa cu e tema aki, na tur dos banda, ta inclui hopi ciudadano cu no ta pertenece na e grupo LGBT.

Di e manera aki, ta parce cu e tema, cu no a haya espacio den e prome debate di Camara di Comercio, no ta parce nos un tema cu lo por keda sin duna contesta ariba.

2LGBT (1).jpg