Home Deporte Oro taekwondo pa Chiara Petrocchi

Oro taekwondo pa Chiara Petrocchi

161
Chiara Petrocchi, medayista di oro Taekwondo

E atleta Chiara Petrocchi a gana oro na e Wegenan Sur Mericano hubenil na Chile.

Diasabra atardi tabata e ultimo speransa pa Aruba logra un medaya mas na Chile ora cu e atleta di taekwondo Chiara Petrocchi a mira accion den e Polydeporte den e Compleho Olimpico Chileno, asina Comite Olimpico Arubano ta bisa.

Mester bisa cu apoya pa henter e delegacion di Aruba, e atleta Petrocchi a bringa su prome combate contra di Peru cual Chiara a gana convincente cu score abulta. Sinembargo e speransa pa logra oro a bini despues cu Chiara a gana den e combate semi final contra di Uruguay unda Chiara ta aplasta su contrincante cu e score di 31 – 10.”

E relato di e comite ta continua: “Mas cu claro e nervionan tabata super halto ora Chiara mester a enfrenta e fuerte contrincante di Brazil. Den e combate final e prome rond a bay 1 – 1 pero den e di dos rond e Arubano a demostra confiansa y ta bay dilanti pa 9 punto. Den e di tres rond ya caba e medaya di oro tabata un hecho, nada no por a bay robes mas. Mas cu claro e delegacion di Aruba a celebra esaki na grandi cu grito y aplauso.”

Segun e relato di e comite olimpico un periodista Brasilero a comenta despues: “Di unda boso a saca e rumannan Petrocchi aki? Nan ta di otro mundo”, referiendo na Sophia y Chiara Petrocchi. Ambos atleta a enfrenta un atleta Brasilero den final na Chile.