Home Local Operadonan di tour turistico a cera entrada di waf di crucero como...

Operadonan di tour turistico a cera entrada di waf di crucero como protesta

399

Ayera mainta tempran un grupo di  tour operator a dicidi di blokia cu nan  vehiculonan e caminda di acceso na nos waf di crucero pa mustra asina nan mal contento.

E tour operator nan ta haya cu ta wordo duna mas preferencia na e taxistanan, mientras cu nan ta wordo poni un banda.  Nan ta considera esaki como un falta di respet pa e trabou cu nan ta bin  haciendo pa basta aña riba nos waf,  tempo cu nan tabata  trahando paden di waf, y despues pafo di nos terminal di crucero.

E  protesta aki caminda e tour operator nan a blokia tur entrada di e waf crucero a trece cu ne cierto molester cerca e turistanan crucero. Pero nan ta haya cu esaki ta e forma cu nan por haya un tiki di atencion. Nan  ta considera cu e trato cu nan ta desigual cu e taxistanan, ya cu nan tin basicamente seis luna durante e temporada halto di crucero pa logra algo. Mientras cu e taxinan ta traha dia y anochi henter aña. Tambe awor nan ta hayando mas preferencia riba nos waf di turista crucero.

Mirando e situacion aki e operadonan di tour ta haya cu mester a bin cu e accion aki for di un par di dianan pasa. Pero ayera nan a wordo sorprendi  -segun nan- cu un borchi cu no ta esun adecua pa e trabou cu nan ta haciendo pa nos turismo. Nan ta haya straño cu nan a bin cu e  borchi aki di un dia pa otro, eventualmente sin autorisacion di e minister demisionario di Husticia. P’esey nan tabata  determina pa mantene cera e caminda di entrada di e waf, te ora cu nan por papia cu e mandatario aki.

Ademas di e borchi,  nan ta haya cu e area unda nan a wordo aloca ta hopi chikito. Tambe e tour operator nan ta haya cu nan a wordo manda leu for di e sitio unda nan por busca nan clientenan. Mientras cu e turista crucero ta desea pa haya e bus tour cerca di e porta di salida di e waf cu porta habri y airco cendi.  Pa nan tur e cambionan aki ta haci  cada bes mas dificil pa nan por realisa nan trabou y gana nan pan.

Nan ta argumenta cu generalmente e turistanan crucero ta bin pa disfruta di nos beach y ta dificil pa convence nan pa conoce nos isla pa medio di un tour bus durante nan estadia cortico. Te hasta awor nan ta obliga di hinca beach aden di nan plan pa haci atractivo nan servicio. Solamente asina nan por haya un tour di dos ora cu e turista crucero. Tanten durante e oranan aki nan ta man  mara, sin por haci nada mas, te ora cu e turista ta caba di disfruta di nos lama.

“E servicio ta keda pa nan. Pa e bon nomber di Aruba ta wordo promovi pa tur e chauffeur di tour bus”, asina un tour operator ta declara.

Falta di informacion
Carlyle Nicholson kende tin mas cu 20 aña dedica na e actividad turistico aki ta haya cu no tin respet pa nan trabou.  E drop cu a basha e hemchi di nan pasenshi tabata cu dialuna pasa nan a wordo informa cu nan no mag di para mas unda nan ta haya e turistanan crucero cu ta desea di duna un tour rond di nos isla.  Pero no solamente nan a wordo prohibi pa para eynan, pero awor nan no sa unda nan tin cu bay. Tampoco tin niun hende por a duna nan informacion .

Nan preocupacion ta  cu nan lo wordo re aloca den un sitio unda nan no por traha den e area di e tanki grandi.  Ta dificil pa nan busca nan clientenan y pone nan cana e trayecto largo aki fei di entrada di waf te e tanki aki cu e propaganda di Digicel .

E ta kere cu como tour bus nan mester haya tur e facilidad pa traha. Nan ta sinti hopi presion di nos autoridadnan, entre nan polis.  Nan ta denuncia cu te hasta nan a haya boet inhustamente den e  mesun area asigna pa nan por haci nan trabou.

E tour operator nan no ta bon organisa entre nan mes y tampoco tin sindicato pa presenta nan. P’esey algun di nan ta considera cu nan ta bira victima di abuso  facil sin tene cuenta cu nan trabou cu ta hopi importante pa nos industria turistico.