Home Den Mi Cabes ‘Nos tur kier felicidad, pero nos ta siña asina tiki di dje’

‘Nos tur kier felicidad, pero nos ta siña asina tiki di dje’

199

NG Yakari.jpg

Mi hendenan! Oei, e luna di gasta placa ta yegando. Undjies mi ta bin Aruba vakantie y mi a bisa tur hende caba niun hende den famia cu tin mas cu 5 anja ta haya regalo. Ta basta. Tur December mi ta yega manera Santa Claus carga cu cos pa tur hende y lo unico cu nan ta haci ta bisami cu mi a bira gordo y dunami stress. Pero bon, ban papia.

Mi ta sinti asina un duele cu den un tempo relativamente cortico dos morto asina tragico a pasa den nos comunidad. E dolor ta mas tanto pasobra tur dos tabata asina hoben.Tanto Sarahi Sierra, como e hoben Wouter de Ruiter tabata merece mihor. Aunke un tabata un fayo medico y e otro un crimen, semper e ta pisa ora nos hobennan bay asina lihe. Ora lo unico cu keda ta pregunta. Un caminda mi a yega di lesa: ‘Un mucha cu perde su mayornan ta un huerfano, un muher cu perde su esposo ta un viuda pero no tin palabra pa describi un mama cu perde su yiu’. Mi ta te hasta sinti cu mi lenga ta pisa, pasobra no mas cu un luna pasa mi a skirbi tocante e caso di Anne Faber y mi a menciona cu mi tabata sigur cu e no lo tabata e ultimo hoben femenino cu nos lo perde den un manera asina violento. Locual menos mi tabata tin den mi cabes ta cu nos mesun comunidad lo a mira algo similar.

Kidia mi tabata pensa cu mi ta skirbi mucho tocante cosnan pisa, cu podise mi mester cuminsa un projecto di felicidad unda mi ta dedica na comparti cosnan cu tabata merece un poema of un articulo pero nunca a haya esaki. Pasobra e realidad ta cu bida no ta solamente sufrimento, e tin su cosnan bon tambe. Pero nos ta asina presente den momentonan alegre cu tin ora nos ta te hasta lubida documentanan. Tur escritor lo bisa, cu skirbi desde un lugar di rabia, di tristesa, di angustia ta hopi mas facil cu skirbi desde un lugar di felicidad. Es mas, mi ta te hasta pensa cu e lo ta hypocresia pa enfoca riba felicidad ora tin tanto cos malo ta pasa na mundo. Cu ki cara nos por bisa cu Sarahi su morto no merece un conversacion? Con mi por laga esaki bay sin menciona sikiera su nomber?

Mino kier tira e pena di mundo henter riba mi lomba, pero skirbi locual ta necesario ta un responsabilidad. Ora Dios a dunabo un talento, e ta bo deber pa uza esaki den un manera adecua. Felicidad ta bunita, nos tur merece esaki pero e berdad ta cu e no ta sinja nos mucho cos. E lesnan di bida ta hinca den tempo duro, bo ta sinja ken ta ken y kico ta kico ora e rollercoaster cuminsa bay abou. Skirbi tocante cosnan incomfortabel ta dolor, specialmente ora bo tin cu keda trece algo doloroso bek dilanti. E manera keda grawata un herida constantemente. Pero den e palabranan di Leonard Cohen “Forget perfect.You have to crack, that’s how the light gets in”.