Home Local Minister: Ta bay introduci ley asistencia di reorganisa debe

Minister: Ta bay introduci ley asistencia di reorganisa debe

220

Minister di Husticia Andin Bikker (POR) a indica cu lo bay introduci e ley pa asistencia di reorganisacion di debe. Esaki segun e relato cu nos a ricibi.

Loke ta pasando ta, cu tin 40% plus di e poblacion cu ta bibando bou di minimo pa biba cu ta pone cu nan ta cay den spiraal di debe, segun minister Bikker. “Hopi biaha si mira e estadistica, ta personanan cu pa falta di entrada y/of situacion social hopi decadente ta cay den tentacion y ta bay over na criminalidad.”

Segun e minister, si kier combati criminalidad mester preveni recidivismo cu ta personanan cu ta cay bek den criminalidad haciendo atraco, entre otro na luganan di bende loteria. “E personanan aki ta cay den detencion, ta bay cera na KIA y despues di dos aña nan ta sali y apenas den un par di siman nan ta comete cualkier atraco. E tipo di actonan aki mester para nan.”

E personanan aki mester por haya guia na un facilidad coreccionnan, e minister ta haya. Minister di Husticia a bishita KIA dos siman pasa unda e por a mira cu e prizon ta den un estado deteriora. Como gobierno lo bay haci compromiso pa construi un facilidad coreccionnan nobo. “No solamente un facilidad nobo, pero tambe cu ta duna contenido na e palabra coreccionnan.”

E minister ta sigui cu: “E persona cu bay den e coreccionnan mester ser reeduca y cu nan por haya un chens bek pa integra na un manera decente y responsabel den comunidad. Awor aki e situacion ta manera un draaideur. Un persona cu ta deteni ta haya un castigo y despues di un of dos aña ta bolbe cay den tentacion den un siman of un luna y ta bolbe comete atraco.”