Home Editorial Mester acuerdo di traspaso di gobierno?

Mester acuerdo di traspaso di gobierno?

No por sigui asina mas

332

Traspaso di gobierno no a bay manera e mester bay. Di ambos banda nos ta tende critica, un ta bisa cu el a laga tur cos na orden, e otro ta bisa cu a bin haya e lugarnan bashi, tabata falta muebles, computer, y un sistema diagital funcionando y cu tur cos riba e computernan cu ta pertenece na gobierno. Tambe lo a desaparece hopi aparatura mas sofistica pa entre otro uso audiovisual. A tende tur sorto di argumento, cu tabatin contrato di lease y cu e doñonan a bin busca nan ekipo pasobra tin cambio di gobernacion. Esey no ta zona logico, pasobra gobernacion ta significa continuacion y no neseariamente un convenio pa entrega servicio ta caba dia un cierto gabinete bay cas.

Nos no ta bay cansa curpa cu averigua ken tin razon o no. Si tin hende cu a hiba propiedad publico cu nan, y lo mester tin record na departamento di Finanzas, anto na su debido tempo esnan responsable lo mester para pa nan actonan. Pero tin un problema mas fundamental aki, cu ta toca e mero curason di gobernacion. Y esey ta e falta di un maneho estricto di tur documento cu ta drenta oficina di gobierno, cu mester keda debidamente administra, cerca e departamento instala pa esaki. Cu esaki nos no ta bisa cu e departamento concerni (BID) no ta haci su trabao manera mester ta. Nos ta mas preocupa pa e circuito informal/formal di documento cu no ta keda registra na e servicio menciona, pero ta bay directamente pa despacho di un cierto ministro, unda e ta keda trata cu e cautela y discrecion cu e caso merece, segun e mandatario. Y esaki sin cu algun dia copia ta drenta den e archivonan central di e servicio menciona. Ta den e documentonan aki ta topa, eventualmente, cu e cosnan cu no ta cuadra cu gobernacion drechi; peticionnan pa cos cu no por honra, segun e leynan vigente.

Pero tambe mester considera e daño cu ta ser haci na administracion publico, si pa desconocimento di cierto corespondencia un gobierno entrante no por maneha e asunto di miho manera. Esun cu ta sali perdi, ta nos pasobra na final di dia ta e pagador di impuesto ta carga e gastonan cu gobierno ta incuri, ora e no por atende su casonan optimalmente. Tin un manera pa pone un fin na e practica nefasto aki, cu no tin nada di positivo pa nos aden. Y pa calma e critica cu nos ta tende caba: Si, nos ta consciente cu e practica aki no a ser inventa e aña aki pa e gobierno saliente.

Lo ta bon anto si gobierno actual, ora nan caba di duna prioridad na asunto cu ta exigi nan atencion awor, percura pa eventual ley y protocol necesario pa percura pa un traspaso corecto y completo. Pa e prome biaha aki sigur nan no mester un acuerdo cu actual oposicion, pasobra lo ta regla cu cual nan mes mester cumpli dia cu nan periodo di gobernacion, cualkier dia cu esaki ta, lo termina. Y nos ta papia di sancion legal aki, pasobra nos no ta kere cu djis un maneho, cu no necesariamente lo haya continuacion cu e proximo gobierno, lo ta suficiente.

Y si tin hende cu ta kere cu ta trata di futilidad administrativo, esey no ta asina, no den tur caso. Kico pensa por ehemplo di un ministro encarga cu Finanzas, cu a baha bay sin entrega un presupuesto complementario completo (e mal yama presupuesto ‘supletorio’). El a entrega solamente e parti di gasto previsto pa fin di aña pero no e parti di e recursonan necesario. En fin, el a move pa e ‘next job’ na Bonaire caba y por lo pronto nos no mester deal mas cu su ehercicionan di acrobacia, manera e mes a yama nan. Anto esaki ta esun cu a bringa pa bira gobernador di e pais aki? No cu Hulanda kier e malo, pasobra ta nan mes ta dun’e trabao atrobe na e isla hermana.

Pero, en serio, tin hopi cos pa drecha den administracion publico. Nos mester, y merece un sistema cera den cual, si e ministro di turno kier destrui su copia personal di e corespondencia, e por dal bay, pero e no mester por yega na destrui loke tin den e archivonan oficial. Y si den e proceso di mehora administracion publico nos mester di asistencia tecnico, esaki ta e asuntonan den cual nunca a falta e disposicion Hulandes pa apoya.

Si ta berdad loke e gobierno nobo ta bisa, cu e accionnan di desorden di e gabinete anterior a pone nan siman o hasta lunanan riba mal pia, mas fuerte ainda mester ta nan motivacion pa no haci mescos y paga e siguiente gobierno cu igual moneda, pero corta paso pa cualkier malhechor den futuro pa comete destruccion na patrimonio nacional. Pasobra cada documento, cada carta cu un ciudadano manda pa gobierno, sea ta un peticion o cualkier otro asunto, mester yega unda e mester yega y mester keda warda debidamente. E epoca di haci y deshaci cu documento oficial mester caba, y e no ta caba cu bon intencion so.