Home Editorial Mercado laboral merece otro metodo

Mercado laboral merece otro metodo

189

Un encuesta pa aña no ta suficiente

Den e dianan aki atrobe un ekipo di encuestado ta subi caya pa recoge informacion encuanto mercado laboral. Algo necesario? Den un sentido negativo sigur, si bo no ta desaroya otro instrumento pa yega na cifra confiabel di mercado laboral. Y pakico lo ta asina importante pa busca otro metodo? Pasobra, a pesar cu no tin nada malo den un encuesta bon haci, no tin tanto sentido si bo frecuencia ta di solamente un biaha pa aña. Bo ta haya un cifra di desempleo, masha bunita, pero si dos luna despues un par di empresa di cierto tamaño cera nan porta, ya caba bo cifra no ta exacto mas.

“Pero, tene encuesta regularmente ta hopi costoso”,  nos ta tende hende ta protesta caba. Y di cierto forma, nan tin rason. Sigur den e tempo aki cu placa lo ta scars, ta dificil imagina cu ta bay tene encuesta tur kwartaal, o miho ainda, tur luna. Y esey no ta e caminda cu nos mester subi tampoco. Tin otro metodo pa yega na informacion adecua, cu un frecuencia hopi mas halto cu un encuesta un biaha pa aña. Kico esaki por ta?

E secreto ta den e uzo di dato digital cu nos por tin di tur empresa, y di tur empleado, salvo e ilegalnan den ambos categoria, pero pa eseynan mester tin otro remedi. Mester ta posibel crea un database di dunado di trabao/empleado, unda ta haci uzo di informacion di diferente instancia cu tin e tipo di informacion necesario. Pa logra esaki nos mester colaboracion di varios instancia, pero tambe un ampliacion di nos manera di pensa. Cuminsando cu e informacion di dunado di trabao, un gran parti, e empresanan ta disponibel na Camara di Comercio. E parti cu ta activo como dunado di trabao ta den e sistema di SVb tambe. Otro instancia, manera departamento di Labor, por contribui pa por tin un lista di tur empresa/entidad cu ta dunado di trabao mas optimal posibel. Tambe e instancianan aki (SVb, Labor) por contribui cu informacion tocante empleado, sin involucra e parti confidencial di por ehemplo e datonan financiero di salario, etc. E strategia ta pa tin un database cu informacion continuo, 24/7/365.

E uzo di codigo uniforme pa tanto empleado como dunado di trabao, y ademas codigo di adres, ta haci posibel no solamente pa tin cifra general di empleo/desempleo, pero pa por duna detaye tocante edad, sexo, luga di biba, profesion di persona desemplea, etc. loke ta brinda e posibilidad di duna informacion hopi mas detaya tocante un gran cantidad di asunto, cu por haya via un encuesta tambe, pero haciendo gasto grandi y un biaha pa aña.

Tin otro metodo interesante pa haya informacion tocante mercado laboral y esey ta haci uzo di e uitzendbureau nan. Con  asina? Si introduci den e ley di uitzendbureau un stipulacion cu periodicamente e uitzendbureau nan mester entrega informacion, atrobe sin nomber di persona ni compania, djis cifra, y den cual sector e pedido di trahado ta. E motibo pa haci esaki ta cu e uitzendbureau ta clave den detecta tendencia den mercado laboral. Si den un sector diripiente tin un oportunidad, e luga pa haya empleado temporal pa por cuminsa lihe, ta un uitzendbureau. Ora cos daña den un cierto sector, e prome pa ripara esaki ta un uitzendburo. Esaki por ta un instrumento valioso pa complementa e database describi anteriormente.

Kico lo ta e beneficionan mayor di e operacion aki? Na prome luga cifra confiabel di con empleo ta moviendo, y tambe economia mes, no en general so, sino tambe por haci distincion entre sector cu ta bayendo bon y otro cu no. Tambe ta bira mas facil pa sigui e movementonan di cierto tipo di profesion cu ta pasa pa otro sector. Cu otro palabra, e base di dato aki ta bay sirbi pa hopi diferente tarea dentro di gobernacion. Ademas e ta bay haci un contribucion pa mehora compliance den henter economia. Ilegalidad di tanto empresa como empleado ta bira mas dificil.

A proposito, nos a lubida di menciona cu di parti di e empleadonan riba permiso, mester ta logico cu DIMAS lo mester coopera cu entrega continuo tambe di e stranheronan cu a base di nan permiso ta ser considera un empleado di e empresa cu a solicita nan permiso. Nan ta un parti importante di e mercado total y comparti informacion cu otro instancia ta haci cu e presion pa cumpli di e dunado di trabao ta bira mas grandi. Si bo tin un probabilidad halto cu nan ta gara bo, anto diripiente e no ta asina atractivo mas pa saca permiso pa un persona, cobr’e pa e servicio ey y no dun’e trabao en realidad.

Tur e tipo di plannan aki ta exigi un cos sigur: boluntad pa traha hunto y e ausencia di agenda scondi na nivel ministerial. E motibo pa bisa esaki ta cu den pasado e tipo di plan aki tambe a wordo diseña, pero e boluntad, no entre e funcionarionan publico, sino cerca varios ministro, no tabata t’ey. Por ta cu awor, si di berdad nos ta drentando un fase nobo, unda eficiencia y transparencia ta clave, nos por reconsidera.