Home Regional Mas di mita di poblacion Brasileño na fabor di pena di morto

Mas di mita di poblacion Brasileño na fabor di pena di morto

159

E apoyo pa pena di morto na Brasil a crece den ultimo decada y ta kibra record. Actualmente, 57% di Brasileño ta faborece castigo di morto, compara cu 47% na 2008, segun un encuesta haci pa e instituto Datafolha.

E datonan ta mustra cu e apoyo a aumenta entre a parti di poblacion di menos recurso, di te 5 salario minimo (R$ 4.700), grupo den cual 58% di e entrevistadonan ta defende pena di morto. Pero,  e porcentahe aki ta cay te na 51% entre entrevistado cu ta gana di cinco pa 10 salario (R$ 9.500). Ademas di esaki, esunnan mas na fabor di e medida aki ta e hombernan (60%), en comparacion cu e muhenan (54%) cu ta apoya e castigo.

E parti cu mas ta di acuerdo cu e castigo di morto ta e esunnan den edad entre 25 pa 34 aña, cu 61% di aprobacion. Tumando na cuenta e aspecto di religion na Brasil, e catoliconan ta esunnan cu mas ta defende e castigo maximo (63%). Di otro banda, e ateonan ta entre esunnan cu menos ta aproba pena di morto, apenas 46% di nan ta di acuerdo cu e medida.

E investigacion a wordo realisa entre mas di 2.700 Brasileño, entre 29 y 30 di november 2017. Actualmente, castigo di morto na Brasil ta ser aplica solamente den caso di guera. E ultimo biaha cu un condena asina a sucede tabata na 1861, na provincia di Santa Luzia, actual ciudad di Luziania, na Distrito Federal. E labrador José Pereira de Souza a wordo ehecuta pa planea asesinato di un baron di e region.