Home Local 71 boluntario honra riba anochi special

71 boluntario honra riba anochi special

213

Ayera anochi a tuma luga Cede Aruba su evento di Boluntario di Aña na Cas di Cultura cual a conta cu presencia di hopi fundacion y organisacion hunto cu nan boluntarionan. Por medio di esaki Cede Aruba kier honra e boluntarionan cu ta asina esencial pa nos comunidad pasobra ‘nan trabou nos no por pone prijs riba dje’.

E manera con Cede Aruba ta para keto pa rindi honor na boluntarionan cu ta traha di manera incansabel pa tanto fundacionnan y organisacionnan cu no tin meta comercial ta di aplaudi. Nos a tuma nota di fundacionnan y organisacionnan cu cada un di un manera of otro ta rindi nan servicio pa comunidad den nan rango specifico. Tur e organisacionnan Cede Aruba a categorisa den 6 diferente grupo: deporte y recreacion, ayudo social, medio ambiente y cuido di animal, enseñansa y educacion, salud y cuido y finalmente no por menosprecia arte y cultura. Un total di 71 boluntario a wordo reconoce.

Un lista grandi di fundacionnan cu hunto cu nan boluntarionan a subi e podium di Cas di Cultura a ricibi nan reconocemento cu a manifesta su mes den un trofeo traha di material recicla. Pa esaki Cede Aruba a colabora cu Plastic Beach Party, cual a crea obhetonan conmemorativo di palo y plastic. E organisacion aki manera nos a yega trece dilanti den pasado- cual por cierto tambe ta non-profit- ta reciclando plastic colecta y creando obhetonan nobo por medio di diferente mashinnan cu ta procesa e plastic.

Pero no ta solamente por medio di trofeonan Cede Aruba a sa di colabora cu organisacionnan cu bon metanan. Te hasta e manpower pa ofrece cuminda na publico a wordo haci por medio di Trampolin pa Trabou.

Organisacionnan cu a wordo honra ta inclui, den ramo social: Fundacion pa Nos Comunidad, Fundacion Arubano di esnan Visualmente Incapacia, YMCA Aruba, Fundacion pa Hende Muhe den Dificultad, Key Club y Fundacion Anti Droga Aruba

Den ramo di salud: Mary Joan Foundation y Kidneys297.

Den ramo di naturalesa y cuido di bestia: Directie Natuur en Milieu, TortugAruba, Stichting Eliezer y Crijojo Trappers.

Den ramo cultural: Fundacion Muchila Creativo, Museum of Industry, Stichting Rancho y Fundacion 1403.

Den ramo di desaroyo den bario: Centro di Bario Tanki Leendert y Fundacion Yudami.

Ademas hopi mas fundacion a wordo reconoci, pero e lista ta mucho largo, pues nos lo menciona esnan cu no a wordo inclui den e publicacion aki den un proximo edicion.

Nos lo elabora mas riba e evento aki den nos proximo edicion pa asina nos boluntarionan haya e atencion mereci. Manera conoci Bon Dia Aruba kier pone mas luz riba desaroyonan social y esunnan cu ta contribui na dje.