Home Eleccion 2017 Lo tin mas o menos 4.000 votado nobo den siguiente eleccion

Lo tin mas o menos 4.000 votado nobo den siguiente eleccion

89
Hubert Maduro

A pesar cu ainda cifranan definitivo no ta formalisa, presidente di Conseho Electoral ta conta Bon Dia Aruba cu ta premira mas o menos 4.000 votado nobo pa locual ta e eleccion venidero den september.

E cifranan definitivo ta bin den e prome siman di juli. Un programado ta bay programa e database di Censo y saca lista di votadonan. Den ultimo eleccion na 2013 segun cifranan riba pagina di web di gobierno http://www.gobierno.aw, esunnan registra cu derecho di vota tabata 68.758. E cantidad di persona cu a vota den ultimo eleccion tabata 58.350 y di esakinan 556 voto tabata invalido. Pues presidente di Conseho Electoral Hubert Maduro ta premira cu e aa aki lo por tin ariba di 70.000 persona registra cu por vota.

No por procesa mas cu 1400 per urna
Segun sr. Maduro, no por procesa mas cu 1400 voto pa cada urna, cual ta esunnan di mas grandi. “E ta interesante si pasobra nos organisacion ta purba di tene e urna na no mucho mas cu mil votado. Pasobra mas cu mil hende ta hopi dificil pa den un curso di un dia conta nan. No ta haci mucho diferencia si ta vota electronico of no. E persona mester bin anto identifica su mes como votado y sigui bay cual ta costa tempo. E urna di mas grandi cu Aruba a yega di conoce tabata na cierto momento den Cadushi Largo, a bira e prome cu a caba di conta.
Nan tabata tin un team bon organisa caminda conteo ta bay rapidamente.”

Probablemente extra urna e aña aki
Lo tin probablemente extra urna e aña aki tambe compara cu ultimo eleccion unda tambe a pone mas cu esun di anterior. Aworakinan no ta conoci si Censo lo por yega na e mesun luganan, pasobra e ta depende unda e crecemento ta. Si e crecemento ta den un urna cu ta grandi caba, segun sr. Maduro lo mester split esaki e ora. “Tin caminda e ta facil. Luganan manera na Noord den cura di misa, of na Savaneta sa tin mas cu un urna. E ta bira mas facil pa bo traha.”