Home Regional Lenin Moreno declara presidente “electo” di Ecuador

Lenin Moreno declara presidente “electo” di Ecuador

80

Diamars Conseho Nacional Electoral di Ecuador a declara Lenin Moreno presidente electo di Ecuador. E representante di e partido den gobierno Aliansa Pais a keda designa despues di un reconteo parcial di e votonan, cu tabata resultado di e di dos buelta electoral na e pais aki.

Moreno a keda declara electo den di dos buelta di eleccion general di 2017 (…) kier men cu e binomio di Lenin Moreno y Jorge Glas Espinel, apoya pa partido Aliansa Pais a keda confirma como ganadornan,” manera Fausto Holguin, secretario di CNE a lesa di e resolucion aproba pa e organismo aki.

Despues di e reconteo parcial di voto cu a ser solicita pa movemento di candidato di oposicion Guillermo Lasso, di partido Creando Oportunidad, e final a cambia na fabor di e candidato oficialista Lenin Moreno ken a keda como ganador cu 51,16%. Lasso a participa den eleccion contra e candidato oficialista Lenin Moreno. Den e proceso di eleccion Lasso a denuncia varios iregularidad, riba 3865 acta di un total di 41 mil acta di votacion.

E porcentahe ta nifica cu candidato oficial Lenin Moreno a haya 5.062.018 contra 4.833.389 voto na fabor di Lasso (48,84%), Holguin a splica den un comunicado na television. Holguin a bisa cu di 10.636.008 ciudadano cu a participa den e proceso di eleccion, 69.436 voto a keda blanco y 670.731 voto a keda declara nulo.

Presidente di CNE, Juan Pablo Pozo a gradici tur participante pa e reconteo di mas di 1.2 miyon voto. Pozo a bisa cu nan participacion a mustra cu “Ecuador ta un sociedad honesto, cu ta respeta democracia y cu no ta complice di ningun fraude.” 

Por gana e proceso di eleccion via di voto. Algun politico no ta kere esaki y cu un strategia di mentira, ta purba di kita validez di e proceso electoral”. Desde dia 2 di april, candidato opositor Guillermo Lasso a defende su mes, bisando cu e proceso di votacion tabata fraudulento y el a considera cu den e proceso e tabata esun cu a haya mas voto tambe. E acusacion aki a ser rechasa pa funcionarionan di CNE.

Lasso y su movimento CREO a solicita un conteo nobo di voto, y finalmente nan a dicidi pa no participa, pasobra nan ta considera cu e conteo parcial tabata un show di banda di presidente Rafael Correa. E solicitud di Lasso tabata pa un conteo total voto pa voto, pero e tribunal contencioso, no a acepta e solicitud aki, pasobra nan ta pensa cu e dos accionnan ta incompatibel legalmente.

Riba e situacion cu tribunal no a admiti e recurso aki, e ex-candidato Lasso a sigura cu e organo a cera porta pa democracia, cu varios excusa procesal y asina a nenga husticia na tur ciudadano.

Correa y su seguidornan a mustra cu nan tin miedo pa sa e berdad, pasobra “nan hues no a opina profundamente riba nos solicitud y e proceso a keda sin legitimidad”, segun Lasso.