Home Regional Honduras: presidente Hernandez vencedor den eleccion presidencial

Honduras: presidente Hernandez vencedor den eleccion presidencial

106

Cu un margen chikito na su fabor den porcentahe di voto: 42.98% contra 41.39% di su adversario principal Salvador Nasralla, actual presidente Juan Orlando Hernández a ser declara ganador di eleccion presidencial di diadomingo 25 di november. Tribunal Supremo Electaral a tarda mas di un siman pa keda cla cu e conteo, cu inicialmente tabata indica un bentaha di mas di cuatro punto di porciento pa e candidato progresista Nasralla, di Alianza di Oposocion. Durante siman cu a pasa su bentaha gradualmente a desaparece y presidente Hernández a tuma un bentaha chikito di alrededor di un punto di porciento, cu el a mantene te final.

Mientras tanto, simpatisantenan di Nasralla a subi caya y a percura pa disturbio y sakeo serio den varios ciudad di e pais. Gobierno a contesta cu imposicion di un toque de queda cu ta vigenta ainda, y aumenta di 8:00 am te 5:00 pm. Te ainda no tin calculo haci di e daño haci na edificio y comercio den henter e pais.

Den e otro resultadonan pa departamento, tambe Partido Nacional di Hernández a sali vencedor den 12 di e total di 18 departamento. Alianza di Oposicion a gana e demas departamentonan. Na nivel di municipio tambe Partido Nacional a gana 91, mientras cu e rival tradicional partido Liberal a logra victoria den 31 municipio.

Ainda no tin claridad kico lo bay sucede despues di e anuncio di TSE, den sentido cu di un banda ambos rival a firma un convenio cu lo acepta e resultado electoral, pero despues Nasralla, ora cu e resultadonan a cuminsa cambia den su desfabor, a declara di lo apela e resultado. Cu e resultado final di dialuna pasa, el a insisti den no reconoce e resultado, cu alegacion di fraude den conteo di voto.