Home Regional Hende morto y desapareci pa yobida na Manizales

Hende morto y desapareci pa yobida na Manizales

68

Diaranson cerca di 12 persona a fayece y otronan mas a desaparece a causa di yobida na ciudad di Manizales, na centro oeste di Colombia. Colombia ta un pais cu apenas ta recuperando di e deslisamento di tera cu a tuma lugar na cuminsamento di luna di april, y cu a laga 323 persona morto na Mocoa.

E prome balans a ser divulga pa Cruz Cora di Colombia cu a informa tocante 8 hende cu a fayece y 20 cu ta perdi, 5 persona herida cu a ser hiba hospital y 40 cas a keda afecta” na ciudad di Manizales pa motibo di yobida fuerte cu a cay den ultimo oranan.

José Octavio Cardona, alcalde di Manizales a confirma cu e situacion no ta facil, pa motibo di yobida fuerte desde diamars anochi y a comunica e fayecimento di 7 persona y “mas di 30 cas cu a cay den otro.”

E ciudad ta incomunica pa derumbe, deslisamento, inundacion” Cardona a splica. E alcalde a splica cu a registra emergencia den varios sector di Manizales y cu gobierno a suspende scol pa asina por duna atencion na e situacion cu a surgi di yobida. Presidente Juan Manuel Santos a suspende su agenda pa asina por biaha pa Manizales mirando e situacion grave na e ciudad. Santos a pidi pa unidad nacional pa gestion di riesgo di desastre y pa funcionario di ministerio di transporte yega te Manizales.

E emergencia nobo aki a surgi poco despues cu un deslisamento di tera a hiba tur cos den su caminda riba dia 31 di maart na ciudad di Mocoa, lagando 323 hende morto y mas di 100 hende cu a desaparece, segun cifra oficial cu a ser divulga diamars.