Home Local Grupo 7 ta pidi gobierno nobo pa actua y investiga asunto di...

Grupo 7 ta pidi gobierno nobo pa actua y investiga asunto di Hospital

184

 E conoci grupo activista Grupo 7 tabata ayera dilanti di hospital pa un manifestacion exigiendo gobierno pa un investigacion. Minister encarga cu Salubridad Dangui Oduber (MEP) lo mester a ricibi e manifiesto pero no a logra presenta, ni tampoco un representante a bin tuma e manifiesto. Grupo 7 su meta ta pa e manifiesto aki yega Tweede Kamer.

Ayera Grupo 7 tabata tin su prome manifestacion pa 2018 cu algun borchi den man dilanti di Hospital Horacio Oduber. E borchinan tabata na Hulandes cu palabranan manera: Onbekwame Toeziecht, ‘Core cu corupcion’ y algun expresion mas. Nan kier e manifiesto aki yega te na Hulanda den Tweede Kamer. Rocky Kelly di Grupo 7 a organisa e manifiesto aki unda cu e firmantenan ta Bobby de Kort y Michael Williams. E manifiesto ta poni cu e grupo aki a yega di manifesta caba di ‘drie maal zo duur’  indicando cu proyecto di expansion di Hospital lo bay costa pueblo di Aruba tres biaha mas hopi. “Pa motibo cu nan no ta transparente ni cu con directiva ta funciona. For di cuminsamento e cos aki a bay fout desde e destaho publico pa e proyecto aki”, sr. Kelly ta bisa. Sr. Kelly a reacciona riba comentarionan cu a bini for di hospital cu e holo fuerte cu tin di Gas Oil ultimamente no ta nada pa alarma di dje. Esaki aparentemente lo ta djis un gas cu ta sali for di un generator cu ta manda holo den hospital. Grupo 7 ta haya cu si bo no tin e experticio, bo mester yama expertonan pa asisti bo. “Y si directiva di e construccion y renobacion no ta apto, pone otro na su luga e ora pasobra ningun rato nan a duna cuenta di con e cos di gas oil a yega asina leu”, sr. Kelly a comenta. E grupo ta haya informacion di hendenan cu ta trahando na hospital como tambe di pashentnan cu ta drumi na hospital cu aparentemente ta haya molester di esaki. E grupo kier mira e cambio real cu a vota pe segun sr. Kelly pa bienestar di pashent, ni trahado ni di pueblo pa loke ta trata salubridad. “Sinembargo ta pueblo lo tin cu bay paga pa 30 aña e proyecto aki cu ta cay bao PPP”, segun sr. Kelly. E mandatario encarga cu salud no a presenta pa tuma e manifiesto di cual e grupo a mustra di ta hopi decepciona pasobra tampoco a manda un representante na luga di e minister.


Mas transparencia

E grupo ta exigi pa tin mas transparencia den hospital. No ta minister di Salubridad tin tur cos di bisa eyden segun sr. Kelly. “Nos ta manifesta na unda nos ta pone e gobierno cu pueblo ta exigi pa trek e cos aki recht si no nos ta para akinan atrobe.” Michael Williams di Grupo 7 tambe a vocifera su disgusto cu e maneho di hospital bisando: “Nos ta para dilanti di un edificio di hospital unda fraude miyonario a tuma luga.” Sr. Williams a sigui expresa cu hospital a costa pueblo di Aruba mas cu 200 miyon. Despues cu bidding no tabata posibel, Grupo 7 a forsa dos parlamentario di AVP pa asina bay papia cu Mike Eman cu ta den e bagamunderia aki hunto cu Richard Visser, Alex Schwengle y Benny Sevinger, segun sr. Williams. Grupo 7 ta bisa cu gobierno di AVP a tolera cu un grupo ‘mafioso’ di Miami bini un bes mas y traha kico cu ta riba nos isla. “Pero awo nos kier forsa gobierno cu tur forsa cu tin pa actua. Pa gobierno sali pafo y haya sa con por ta posibel AZV ta manda nos pashentnan na Bucaramanga. Unda cu un hospital cu tin 1400 pashent, y aki el a costa na Colombia 200 miyon. Y aki a mira un cos cu a wordo construi cu nos ta bisa ta sin balor”, sr. Williams ta bisa. Grupo 7 a manda un mensahe cla tambe pa Ministerio Publico actua riba esaki tambe.