Home Local Freezone Aruba NV tambe afecta por medio di situacion na Venezuela

Freezone Aruba NV tambe afecta por medio di situacion na Venezuela

270

Freezone Aruba NV a pasa den algun momentonan turbulento ultimo tempo hunto cu otro Freezone nan den region. Un di e causanan di e situacion financiero dificil di Freezone Aruba no ta e competencia segun e director, pero mas bien e situacion pasando na Venezuela.

Cosnan toch ta mustrando ultimamente miho y lo sigui mehora mesora manera cu gobierno di Venezuela cambia, segun director di Freezone Aruba NV Greg Peterson ta splica Bon Dia Aruba.

Recientemente Bon Dia a ricibi e noticia cu Freezone Aruba NV lo ta den problema financiero basta serio. A sali conoci cu tabata tin un peticion di subsidio pendiente di Freezone Aruba NV cerca gobierno di 1 miyon florin. Pero un NV no ta haya subsidio, mas bien esaki ta placa cu Freezone a haci peticion na gobierno y lo mester haci un areglo pa paga esaki bek segun e director. Ta conoci cu situacion financiero di e empresa estatal ta bastante dificil. Esaki ta resultado entre otro di e cifranan di actividad economico disponibel. Por ehempel cifranan di importacion y exportacion a baha. Freezone Aruba NV ta un plataforma fiscal pa haci negoshi internacional. Na momentonan aki tin 44 compania cu ta den e Freezone Aruba NV. Un gran parti di e negoshi ta cu Colombia y Venezuela.

E crisis economico mundial di 2008 a trece basta efecto pero e no a mishi cu Freezone mes segun e director. Pero despues cu Venezuela a cuminsa haya problema anto a cuminsa pone prijs maximo riba productonan. Pues tur e clientenan di Freezone mester a stop un rato y bisa cu nan no lo ta bendiendo nada pasobra nan lo perde na Venezuela. Henter e mercado regional a sinti efecto di esaki tambe, Freezone na Panama, Corsou, Aruba etc. Colombia a haya un sla den su balor di placa di 40/50% rond di un aña pasa anto esey tabata tin di haber cu mercado di China cu a crash. Pues Colombia no tabata por a bende na China y nan a baha e balor. Esaki tabata algo tambe cu a cay poco duro tambe pa Freezone Aruba na 2015 segun e director ta splica nos. Colombia a haya hopi duro no solamente for di China pero di Venezuela tambe. Panama ta kisas esun cu a haya mas duro y perde un suma grandi di placa.
“Nos tin e beneficionan y bentahanan mas fuerte pa companianan, nos ta esun di mas barata y di mas cerca di Venezuela y Colombia. E ta bay mas na e mercado local na Venezuela cu ta trece problema.”

Cuater aña pasa tabata tin un analisis cu a wordo haci por medio di un universidad Caribense unda cu a constata cu e isla number uno haciendo negoshi cu sur America tabata Trinidad. Esaki tabata incluyendo e benta di petroli y gas. Ora cu a elimina e benta di petroli y gas, e isla number uno haciendo negoshi cu sur America a bira Aruba. Sr. Peterson: “Basa riba e estudio ey nos sa cu nos ta bayendo miho cu tur e resto. Anto esey tabata un estudio/analisis independiente pafo di nos.”

Peticion na gobierno
Den e tipo di negoshi aki, bo mester ta mas economico cu bo entrada pa motibo cu mester semper wak den un bala di cristal segun e director. Pues ultimo temponan a keda draai cu placa cu nan a reserva tempo cu nan tabata bayendo bon, den caso cu nan mester haya algun tipo di sla pa nan por toch sigui opera. Pero na 2016, e modelonan a mustra cu lo bini problemanan financiero. Pues Freezone a splica y manda un peticion na gobierno di 1 miyon florin. E placa aki a bini na januari 2017 y ta algo cu nan mester haci un areglo pa paga esaki bek segun e director. “Negoshi ta picking up ultimamente si y tin di haber cu mercado di Colombia y Venezuela. E lunanan di mas fuerte pa nos semper ta november, december y januari. E motibonan ta hopi simpel pasobra nos cultura akinan ta cumpra mas durante temporada di Pasco y carnaval”, e director ta bisa. Pues pa otro aña lo por mira con cos ta bayendo actualmente den cifra.

Motibonan pakico a bay poco atras
Un otro factor teoreticamente segun e director cu ta treciendo problema pa Freezone Aruba, ta ora cu Merca a bini despues cu e regla cu nan tabata kier barconan di turismo y carga separa for di otro. Pasobra e tabata basta facil pa un di e botonan chikito carga por ehempel explosivonan of cosnan asina. Pero esaki ta tempo cu tabata tin situacion tenso den sur America cu un gruponan militante manera FARC. Pais Aruba pues a cuminsa manda tur e botonan chikito pa Barcadera. Akinan a cuminsa bin e fase pa move henter Astec pariba y traha un luga special pa e barconan chikito (barques), esaki a keda palabra segun sr. Peterson. “Nan no ta compronde cu nos mercancia ta bin den container y sali for di barques. Si bo pompa e barques, den un manera of otro bo ta tirando bo mes den bo pia”, sr. Peterson ta bisa. Un otro teoria ta cu despues autoridadnan a move e botonan pa un luga ainda mas chikito, algun di e botonan aki a cuminsa bay Corsou. “Nos mester a bay sinta cu e autoridadnan pa pidi nan pa no core cu e botonan aki pasobra e ora no tin negoshi.”

Con ta genera placa
E companianan ta paga Freezone un suma di facilidad pues Freezone ta depende na e companianan pa entrada pa motibo cu nan no ta haya entrada di gobierno of otro manera. Nan ta haya 0,75% di e omzet.
Pues si e compania tin un omzet di 1 miyon florin, nan mester paga Freezone 75.000 florin. Freezone a tuma nota cu durante e ultimo añanan e negoshi tabata bayendo riba y bao te cu na 2015, unda nan a haya un sla basta fuerte. Na 2016 nan a cuminsa mira cu cos ta mehora atrobe segun sr. Peterson.

“Nos bukinan ta basa riba e bukinan di otro companianan. Ora cu nan cera nan bukinan rond januari/februari/maart/april, nos mester warda te ora tur nan bukinan ta cla y esey ta bisa nos kico nos bukinan ta bay ta. Aworaki nos ta cerando e bukinan pa 2016 y pa otro aña mita di aña nos ta cerando bukinan di 2017. Semper e dura asina hopi cerca nos.” Mayoria biaha nan mester mira via un bala di cristal pa wak con cos ta bay traha, segun sr. Peterson. Freezone Aruba ta den un poco miho situacion cu Corsou por ehempel pa motibo cu Aruba tin un omzet mas grandi.
E diferencia ta cu na Corsou no tin suma di facilidad pa paga, ta solamente huur edificionan.
Pues nan sistema di entrada ta funciona casi manera aeropuerto.

Zona economico San Nicolas
E gobierno anterior tabata papiando basta riba un tipo di zona di economia na San Nicolas. Esaki tabata un di e instrumentonan (begunstigend beleid). Sr. Peterson: “Nos tabata e unico cu a implementa e begunstigend beleid den 2013. Esaki tabata na bentaha di nos clientenan pero e begunstigend beleid nacional ainda no ta regla den ley. Anto e segundo parti tabata e zona economico na San Nicolas. Tur documentonan t’ey y nan no a pasa nada ainda. Ta algo tambe pa wak kico e siguiente gobierno lo bay haci.”