Home Local Evento riba salud mental ta mustra atrobe falta di informacion y ayudo

Evento riba salud mental ta mustra atrobe falta di informacion y ayudo

425

Diamars anochi patras di Renaissance Convention Center Departamento di Salud Publico (DVG) su plataforma promocion di salud a tene un evento titula Ban Papia. Durante e anochi oradonan cu diferente bista riba problematica di salud mental riba nos isla a presenta riba e podium pa un audiencia di casi 200 persona.

E evento, organisa riba dia mundial di salud mental a mira diferente oradonan di experiencia profesional y personal cu salud mental. Durante e anochi personanan interesa por a acudi na un profesional sinta ful patras pa asina hiba un charla personal riba e topico dilanti. Esaki e organisadonan a haci pa asina curasha hende pa papia mas riba e topico di salud mental, cual ta sufri di un stigma grandi den nos comunidad.

Pa cuminsa e anochi un poema skirbi specialmente pa Alydia Wever a wordo presenta hunto cu un baile di Janice Sint Jago.

Un gran cantidad di hende ta lidia cu problemanan di salud mental
Despues di esaki psicologo Misha Raymond, kende ta traha como terapista di conducta cognitivo na Polikliniek Kinder- en Jeugdpsychiatrie. Sra. Raymond a enfoca riba con trastorno mental ta afecta hobennan, pero tambe nan amistadnan y famia.

El a aclara cu tur persona por y sa haya un halucinacion na cierto momento den nan bida. “Esaki ta algo normal. Un trastorno mental ta ora cu e sintomanan aki ta persisti pa un plaso largo y ta afecta e bida y relacion personal di esnan cu ta haya e trastorno”. Te hasta cifranan ta mustra, segun sra. Raymond, cu cada 1 den 4 pa 5 persona a yega of ta lidia cu problema di salud mental.

Sra. Raymond a curasha tur hende pa tene mente habri ora ta trata cu topico di salud mental pa asina kita e stigma cu ta rondona e topico aki.

No tin informacion y cuido adecua pa salud mental
Durante e anochi dos persona a bin dilanti cu a enfoca riba e aspecto di experiencia personal cu salud mental den famia, esta Joanne Dirksz y Michael Lampe.

Sra. Dirksz, kende tin un familiar cu ta sufri di schizofrenia, a conta di e dificultadnan cu su famia a enfrenta ora a haya nan mes enfrenta cu salud mental. “E ta hopi duro pa acepta kico e persona tin. Nos  por nota cu e no ta bayendo pa dilanti y nos no sa kico pa haci. E persona mes ta kere cu tur cos ta bon cu ne, pero den famia nos por nota cu e no ta su mes.”

Loke ta keda un reto grandi riba Aruba ta cu no tin suficiente informacion rondonando e topico. Pues p’esey sra. Dirksz su famia a haya asina dificultad tratando e tema. “No tin informacion suficiente ni ayudo adecua pa e famia y metodonan pa trata e pashentnan”. Alabes e echo cu ta dificil pa haya un cita cu psikiatra of psicologo ta hacie extra dificil.

Pa purba yuda conscientisa esnan cu tin familiarnan cu problemanan di salud mental manera schizofrenia, sra. Dirksz a crea un grupo riba Facebook yama Let’s talk mental health Aruba. E grupo aki ta pa personanan cu tin famia of amigonan cu ta lidia cu problemanan di salud mental por intercambia informacion riba e topico.


Sr. Lampe di su banda a conta di su experiencia cu su tata Seferino Lampe kende a sufri di salud mental. El a detaya riba e diferente experimentonan cu tabata haci riba hende cu salud mental antes. Esakinan tabata encera te hasta tratamentonan inhumano manera shock terapia y remedi experimental. Tambe sr. Lampe a subraya cu ora e famia ta purba yuda, e pashent ta pensa cu e famia mes ta un di su enemigonan.

Algun persona cu nos reportero a acerca despues cu e charlanan a conclui a comenta riba e iniciativa di DVG riba e anochi (nombernan ta conoci na redaccion).

Un di e personanan a comenta cu e anochi tabata informativo, aunke no a drenta hopi profundo den e topico. Mescos cu varios oradonan a expresa, el a haya cu ‘tin hopi trabou ainda cu mester tuma luga riba area di salud mental na Aruba’. Aunke e ta simpatisa cu e problemanan cu famianan ta enfrenta nan mes cu ne, ‘tambe ta posibel pa haya informacion online awendia’. “Pero mi ta kere ta importante pa conscientisa e publico riba kico ta e camindanan cu bo tin cu cana of pa tratamento di salud mental.”

Otro persona a haya e iniciativa uno positivo, mirando cu no tin hopi otro organisacionnan cu ta organisa eventonan pa papia di salud mental. “Loke mi a haya mas interesante tabata e dos storia personal cu e oradonan a comparti. Mi ta haya cu semper ta bon pa tin mas informacion pero e banda personal ta hacie mas interesante. Asina bo ta wak con personanan ta lidia cu e problema den realidad.”

Tambe e persona a haya un bon idea pa e oportunidad di tene un combersacion ‘one on one’ cu otro persona riba topico di salud mental. “Asina e porta ta habri pa mas hende por sinti nan mes comfortabel di papia riba e topico.”

Saca politica di e maneho di salud mental
Un studiante den rango di trabou social na Universidad di Aruba ta comenta cu ‘ta importante pa sigui promove e tipo di eventonan y iniciativanan aki’. E studiante ta subraya cu mester saca politikeria for di e formula pasobra e tipo di iniciativanan aki ta importante pa Aruba. Pues ‘mester evita pa politica stroba desaroyonan cu ta tumando luga’.

“Specialmente awo cu nos ta na un momento critico di cambio di gobierno, ora minister Schwengle wordo reemplasa ta bira insigur si lo sigui en caso cu e otro persona cu drenta tin otro pensamento.”

E studiante tambe a haya e charlanan di experiencia personal hopi interesante, specialmente pasobra e personanan cu a bin dilanti ta durf di comparti nan storia.