Home Editorial Enfoca riba e ser humano ta hopi amplio

Enfoca riba e ser humano ta hopi amplio

235

E acuerdo reciente entre e tres partidonan cu pronto lo forma gobierno ta enfoca como prioridad riba e ser humano. Naturalmente esey ta un concepto bastante amplio cu ta cubri hopi cos. En general e preocupacion ta hustifica, mirando e problemanan cu nos comunidad tin actualmente. Pero e cantidad di diferente grupo den comunidad cu ta pidi atencion ta grandi y tur hunto ta significa gasto grandi pa gobierno, cu na e momento aki sigur no por bay cubri tur pareu. Esaki ta consecuencia di e maneho di e gabinete saliente, cu entre otro a corta pisa den e subsidio na diferente fundacion cu ta traha riba varios aspecto di asistencia social. Esaki no tanto den subsidio riba salario pero si den gasto di operacion, loke pa e entidadnan aki ta mes grave, pasobra esey tambe ta afecta nan trabao severamente.

Ta importante dedica atencion serio na e grupo di persona di edad halto, y esey no solamente pa loke ta nan pension. Ta notabel cu den e acuerdo ta menciona como prome punto haci uzo di experticio y conseho di pensionado den por ehemplo directiva di fundacionnan y stimula participacion laboral. Nos no por ta mas di acuerdo. Yega edad di pension no ta significa obligatoriamente bay sosega, aunke pa esunnan cu ta desea esey lo respeta nan escogencia. Pero mester pensa cu e crecemento hopi rapido di nos poblacion cu a casi ta dobel di loke e tabata 30 aña pasa, ta pone hopi presion riba nos bida organisa en general, no solamente den trabao social, pero tambe den deporte, hasta den sector priva. Por ehemplo den e acuerdo aki mes na tanto ocasion ta referi na un comision o entidad cu mester crea. Un dado momento bo ta cuminsa pensa: “ta ken mester bay den tur e cosnan aki?” Nan tur ta parce mes importante y nos no ta duda cu nan ta, pero bo ta hayando e fenomeno caba cu hende cu talento organisatorio, y ademas cu cierto conocemento profesional ta haya oferta o peticion continuamente pa join un o otro organisacion cu mester di dirigente experimenta, y nan ta scars. Uzo maximal di nos recursonan humano di edad ta un clave den e añanan nos dilanti.

Pa loke ta e tema di reduci edad di pension, ta parce cu den e deliberacionnan a yega na un consenso cu ta miho pa bay trankil y bay studia e asunto bon, prome cu introduci un eventual cambio pa 62 aña como edad di pension y/o introduci un sistema flexibel cu ta permiti bay cu pension prome, cu un rebaho riba e suma di pension. Despues di e analisis extenso cu a haci caba di parti di SVb riba e materia aki den e ultimo añanan, nos ta di opinion cu un sistema flexibel ta factibel, pero simplemente reduci e edad na 62 aña no. Pero cu tempo lo entama e discusion ey atrobe.

Un aspecto importante ta e atencion na e bida familiar y specialmente e apoyo cu mester brinda na e mayornan pa nan por enfrenta e retonan di ta mayor miho. En general esaki ta encera percura pa e facilidadnan cu ta un alivio, y substituto parcial di e bida y supervision familiar. Ta grato pa mira cu ta reconoce e importancia di amplia e proyecto di Traimerdia, cu ta brinda un ayudo concreto pa mehora supervision y guia durante e parti di dia ora e mayornan hopi biaha no ta disponibel ainda pa atende nan yiu pa motibo di trabao. Realmente ta straño cu e partido saliente di gobernacion, cu a inicia e proyecto aki tanto aña pasa, no a haci mucho esfuerso pa sigui amplia esaki. A haci un intento debil pa extende e programa na e scolnan secundario pero tur cos a keda depende di financiamento cu no tabata disponibel, debi na e situacion financiero precario di gobierno.

Tambe, un di e aspectonan di trabao social cu ta urgente pa atende ta e abuso di mucha den tur su forma y gradonan, pasobra esaki no solamente ta rechasabel di mes, pero pasobra e ta kita futuro di mucha y por lo tanto ta afecta nan desaroyo pa nan por contribui como ciudadano. Den e ultimo añanan e tema a haya hopi mas atencion, pero no di e autoridadnan cu mester a percura sikiera pa por tin protocol transparente pa publico en general tin un claridad con pa actua den caso di mester denuncia delito contra mucha.

Finalmente, nos por bay mira un ampliacion di e canasta basico cu hopi mas producto di primera necesidad bao di prijs fiho stipula pa gobierno, asina facilitando bida pa esunnan cu entrada modesto. Pa hopi aña regularmente tabata comenta e diferencia grandi entre e lista reduci di producto di Aruba, compara cu e lista amplio cu mas di 50 producto, incluyendo fruta y berdura fresco cu Curaçao conoce. Tabata parce cu na Aruba no kier a reconoce cu e grupo grandi di ciudadano cu entrada abao tabatin mester di un alivio. Ademas esaki ta un di e medidanan cu no ta costa asina hopi pa gobierno, aunke mester aumenta capacidad di inspeccion y control.