Home Editorial Economia di ‘conocemento’ ta factibel?

Economia di ‘conocemento’ ta factibel?

29

Regularmente gobierno ta bin expone nan plannan pa crea un ‘economia di conocemento’ (kenniseconomie). E idea ta pa transforma Aruba su economia di uno basa mayoritariamente riba trabao di nivel abao den educacion y pago, den un economia basa riba actividad cu ta rekeri un contenido fuerte di trabao di nivel halto, den educacion y pago.

Riba su mes e pensamento aki ta bon, esey ta e direccion cu nos mester busca pa sali for di e problemanan den cual nos ta haya nos mes si nos continua sin mas cu un sector turistico cu a yega na final di su potencial di rendimento.

Nos por sigui pone mas hotel grandi den e luga aki, pero un dado momento e desbentahanan ta mas grandi cu e bentahanan. Mas hotel ta implica mas importacion di labor di poco educacion (y poco pago). Esey tin como consecuencia cu e clase medio mester compensa pa e suma chikito cu e salarionan chikito ta aporta por ehemplo na AZV, mientras cu e averahe di gasto pa persona ta hopi mas halto. Tin mas argumento den e mesun linea aki, pero nos ta laga esey pa otro momento.

En todo caso, nos por apoya e pensamento cu, orientando nos mes den direccion di un clase medio fortifica cu un grupo considerabel di profesional bon paga, ta un garantia cu nos por mantene nos economia mas stabiel y nos fondonan social y medico, sano a largo plaso. Sin embargo, despues di pone nos di acuerdo, ta keda e tarea ta con nos ta bay realisa esaki. No mester lubida cu riba e otro islanan den nos region nan tambe ta kibra cabes kico ta e ‘next step’ pa mantene nan economia riba rails, y ta bin riba e mesun ideanan cu nos tin. Esey anto ta trece e siguiente preguntanan: uno, con competitivo nos lo ta den e wega aki? Y dos: kico mester haci pa por ta competitivo?

Na prome luga nos lo mester crea e sectornan cu ta exigi un input grandi di hende cu educacion halto. Nos ta haciendo esey? Den cierto sentido por considera e refineria (upgrader) un sector cu tin un proporcion bastante halto di profesional tecnico, cu un salario corespondiente. Mester bisa si cu no por spera cu un upgrader ta exigi mes tanto presencia di ingeniero na nivel halto, ya cu no ta trata di un proceso asina compleho manera den un refineria mes. Al final de cuentas, e no ta mucho mas cu mehora calidad di crudo, pa percura pa e ta di tal calidad cu por bende esaki como crudo.

Naturalmente cu e proceso ta entrega algun producto mas, manera e nafta cu por transporta pa Venezuela pa uzo den e posnan di petroleo pisa di Orinoco. Tambe e procesamento di residuo den e delayed cokernan ta produci producto final manera petcoke (carbon) cu tambe tin su mercado. Sin embargo, fuera di esaki nos no ta mira otro sector ta logra saca cabes, a pesar di tur e plannan bunita di cual nos ta tende. Un di e sectornan clave den desaroyo di un economia di conocemento ta comunicacion digital. Y un di e obstaculonan mas grandi ta e posicion di monopolio di Setar, cu ta impedi por ehemplo e ampliacion di e servicionan di provider, por ehemplo via e creacion di mas cable marino, cu por mehora e posibilidadnan pa diferente tipo di actividad riba tereno di ICT.

Algun tempo pasa e compania Digicel a dirigi su mes na pueblo y gobierno di Aruba den un ‘carta abierta’, cu den palabra diplomatico ta conta di e problemanan cu nan ta haya pa haya permiso pa trece otro cable di fiber na Aruba. Un inversion di sigur US$ 50 miyon cu nos no por probecha si e maneho di gobierno no cambia. E maneho ey aparentemente ta basa riba nenga tur hende tur cos cu por ta parce remotamente competencia pa Setar. Y cu den e proceso aki ta blokia tur cos den desaroyo di servicio digital, ta algo cu ni sikiera ta yega na ta un punto di discusion publico. Loke ta sosodiendo ta cu e departamento concerni, hunto cu e ministro responsabel, ta percura pa Digicel mester cana e mesun caminda di cruz cu otro companianan mester a cana añanan largo, via LAR y corte, sin ningun garantia di logra algo.

Pa corona obra, esun cu awor ta propaganda e ‘kenniseconomie’ ta e anterior man drechi di e ministro encarga cu telecomunicacion, cu a promove pa puesto di ministro encarga cu asunto economico. Di hopi cerca e mester conoce e maneho contradictorio aki cu gobierno ta hibando pa añanan largo caba. Lo ta interesante si na luga di simplemente keda plama e propaganda di economia di conocemento, e cuminsa na un manera honesto clarifica ta con gobierno ta desea di yega na esaki, si nos no ta mira nada sucede pa kita e obstaculonan for di caminda, cu mayoritariamente ta den man di e mesun gobierno.

Cu esaki, ainda nos no a yega na trata e otro desafionan cu ta stroba nos. Nos ta continua den e proximo editorial.