Home Local Di cinco asesinato pa 2017: Persona cu varios hinca haya banda di...

Di cinco asesinato pa 2017: Persona cu varios hinca haya banda di caminda

7393

Ayera mainta un patruya coriendo na altura di OK Supermarket na Tanki Leendert a wordo para por medio di un grupo di persona banda di caminda. E patruya a bin constata cu tin un persona riba vloer cu varios hinca na su curpa. Esaki a bira e di cinco asesinato cu Aruba ta registra pa aña 2017.

Personal di ambulance cu a yega na e sitio y a purba reanima e persona, pero esaki tabata envano segun informacion di Cuerpo Policial. Dokter Texier a constata morto 06.05am di Chini Tse Mora, naci na Santo Domingo, 19 di october 1977. Esaki pues ta bira e di cinco asesinato pa aña 2017 segun Cuerpo Policial, ni algun dia despues di e caso lamentabel na cas di pueblo den de Vuyst. Segun informacion di arubanative.com, na e sitio algun testigonan a conta cu nan a mira tres persona bringando cu e victima. Nan a grita nan y ora nan kier a bira pa yuda e victima, nan a bin topa cu ne bao sanger y gravemente herida. Tambe a mira un di e tres personanan cu cuchiu den su man.

Canades
Esaki seguramente a causa un otro shock pa comunidad cu mesora a cuminsa reacciona via rednan social riba e noticia aki ayera mainta trempan. Hopi hende ta den asombro cu tin atrobe un otro asesinato ni algun dia despues cu a caba di pasa uno na San Nicolas, ainda sin ningun detencion of sospechoso.

E prome asesinato cu nos a conoce pa aña 2017 tabata e caso na Jaburibari di un homber Canades cu un herida di bala na cabes. Segun corant Canades CBS, a trata di hoben Thuy Hoang Nguyen Quach anto su pareha e tempo ey a inicia un proceso pa genera fondo pa transporta e curpa bek pa Canada. Un rato despues cu e suceso a tuma luga tabata tin un persecucion formal na altura di Mc Donalds Palm Beach. E persecucion a termina na altura di Aruba Bank Hato caminda cinco persona a wordo deteni, tres masculino y dos femenino. Durante e persecucion, un di e personanan den e auto a tira un gran cantidad di biljetenan for di e auto y probablemente mas cos. E investigacion riba e caso aki a avansa te na punto cu tabata tin sospecho serio contra un solo sospechoso, y otronan a keda despues den libertad. Despues di esaki nos no a tende nada mas for di Ministerio Publico riba con a sigui cu e caso. Algun luna pasa nan a informa cu na interes di e investigacion nan no lo por a brinda ningun informacion mas.

Tiro na Olde Molen
Despues den e mesun luna rond fin di mei tabata tin un otro caso di asesinato registra den area di Olde Molen. Cuerpo Policial a confirma identidad di e victima Ralph de Palm, naci na Haiti na 1990, e tabata tin 26 aña di edad. E sospechoso den e caso aki, Erick Arturo Minguel Junior Schneiders di 22 aña a entrega su mes na warda di polis despues cu autoridadnan tabata buscando e pa algun dia.

Persona haya morto den cas
E otro caso cu a sosode despues tabata uno na Sero Largoweg, San Nicolas unda cu un ciudadano a topa cu un persona sin bida den cas. Patruya di San Nicolas a yega riba 9 di september, un dialuna mainta, y topa cu un homber benta abo den un plas di sanger. Aparentemente e lo tabata tin por lo menos dos tiro na su curpa. Un investigacion a start mesora riba e caso aki y ainda nos no a tende ningun desaroyo di dje tampoco. Akinan ta trata di victima Roque Alvin Thijzen, miho conoci como Roy Thijzen di 52 aña di edad. Ultimo cu a wordo informa tabata cu polis lo kier sa cu ken e victima tabata tin contacto den e ultimo dianan prome cu su morto. Particularmente den e anochi y madruga prome cu el a wordo tira. Tambe riba ki sorto di contacto esey tabata ta. E tiplijn di 11141 ta keda habri pa esaki ainda.

Caso de Vuyst
E caso recien na cas di pueblo de Vuyst unda un hoben a perde su bida den un manera bastante cruel tambe a causa basta comocion den cuminda di Aruba.
Hopi ta esunnan cu ta comenta ainda cu nan kier wak husticia. No tin ningun sospechoso of detencion cu a bini den e caso aki ainda tampoco. E dama hoben di 19 aña a wordo haya sin paña, cu un saco di plastic mara na su cabes y aparentemente cu heridanan manera si e tabata tortura den un forma of otro.
Un punto cu colega di prensa Juan Werleman a trece dilanti algun dia pasa, ta cu mester tin detaye basico cu Ministerio Publico por comparti cu prensa. Esaki pues pa yuda cu e investigacion di e caso. Sinembargo Ministerio Publico ta keda hopi limita cu nan contestanan y informacion cu nan ta brinda na prensa relaciona cu casonan di asesinato.

Den e caso aki di de Vuyst, sr. Werleman por ehempel a trece e preguntanan basico dilanti manera ‘unda y ki ora tabata e ultimo biaha cu a wak e victima? si tin un tijdstip di e crimen cu a costa bida di e victima y cuanto persona por ta envolvi?

Ministerio Publico
Na e interes di e investigacion, Ministerio Publico ta opta na momentonan aki pa no contesta e preguntanan aki ainda. “Pasenshi mientras e investigacion ta cana. Asina cu tin algo nobo ta wordo informa. E por ta informacion cu a keda estableci caba, pero igual e ta informacion cu ta forma parti di e investigacion y cu fiscal no kier haci conoci ainda. Corda cu e sospechoso ta sigui noticia. Confiansa, pasenshi mientras cu e investigacion ta canando,” vocero di Ministerio Publico a contesta prensa algun dia pasa.