Home Editorial Defensa di maneho gubernamental ta esencial

Defensa di maneho gubernamental ta esencial

32

Debate debilita cu ausencia di AVP

E noticia di ultimo ora cu e partido den gobernacion no lo a participa na e debate teni ayera nochi sigur tabatin consecuencia pa e caracter di e evento. Un cantidad grandi di partido cu ta comparti nan desacuerdo hiba den dos periodo di gobernacion pa e partido aki, no ta suficiente base pa por tin un bon debate. Ta indispensabel pa por tin ambos punto di bista presente, tanto esun cu ta defende maneho di gobierno, como esunnan cu ta opone esaki. Cu personalmente nos por ta pro o contra e maneho hiba, esey ta otro asunto. Sin esaki, e gama di opcion pa esunnan presente o cu ta sigui e debate di otro forma, no ta completo.

Pa loke ta e motibonan pa no participa, e partido a duna su opinion caba. Nan tabata desea di manda un otro persona, loke a primera bista ta parce nan bon derecho. Nan lo mester sa ta ken ta defende nan partido bon. Di otro banda, e organisacion di e evento tambe tin rason ora nan defende e posicion cu di inicio nan a pone como condicion cu nan ta desea di tin e lider di partido den e debate. Tur a bay di acuerdo y no tin motibo awor pa desvia di esey. Tin sin embargo un consideracion extra y esey ta cu e partido en cuestion ta esun cu a carga responsabilidad gubernamental pa dos periodo di gobernacion sigui, y ta importante pa por tin nan punto di bista na mesa, vocifera pa esun cu a duna e gabinete su nomber. Si acaso pa un of otro motibo e lo no tabata por ta presente, lo tabata logico pa manda e ministro cu ta alabes vice minister presidente den actual gobierno. Manda un persona totalmente nobo riba e firmamento politico ta un paso bastante straño. E hecho cu e audiencia pa gran mayoria ta consisti di hende hoben, ‘millenials’, no ta cambia e temanan tanto, pasobra mescos cu tur otro hende, hobennan tambe kier tende opinion acerta riba tur tema prioritario. Por ta cu e angulo for di cual ta observa un asunto o problema por ta diferente, pero ta inimaginabel cu ta bay tin un debate cu no ta encera financia publico, enseñansa, salubridad publico, bon gobernacion, etc. Di e banda aki por tin comprension pa e organisadonan cu nan ta desea di garantisa calidad di nan evento.

Ta keda pa semper un pregunta, sin embargo, kico lo a sucede si e partido berde tabatin un nobato politico pa representa nan den e debate aki. Mirando e experiencia acumula na e banda di oposicion, y un nobato cu no ta tanto na altura di e detayenan di e experiencia gubernamental di ocho aña, e debate por a converti den un desastre pa e partido den gobierno. Esey ta trece tambe e duda cu ne, con serio e partido ta den laga su representacion den man di un peso pluma, pa bon orador cu e por ta. Y mas ainda, pasobra e lider di partido mes como bon orador, den e ultimo dos debatenan grandi cu tabatin, esun di KvK/ATIA na 2013 y esun di KvK e aña aki, no por a garantisa un exito. Na 2013 e mal actuacion di e lider a keda sin consecuencia pa motibo di un campaña convincente riba otro aspecto, cu a hiba na e victoria historico di e eleccion ey. Awor, cuatro aña despues, nos ta papiando otro coyuntura, unda e critica general riba maneho gubernamental ta hopi mas severo, y e conflictonan interno cu a conduci na salida di varios politico di peso for di e partido aki, ta indica un escenario diferente. Den e prome debate di Camara di Comercio luna pasa, medionan di comunicacion pa mayoria tabata di opinion cu e lider di partido berde no a luci cu un presentacion impactante. Nos por ta di acuerdo cu esey, aunke nos no a mira actuacion asina briyante di e opositornan tampoco. En general nos por constata cu falta hopi dominio di tema cerca e politiconan, loke ta causa hopi discusion cu ta keda pega den observacionnan superficial, cu no ta yega na e curason di e asunto. Asina cos no a bay bon pa nos Prome Ministro, pero e daño a keda limita pasobra e contrincantenan tampoco tabata tremendo.

Awor, e cambio repentino pa propone un otro persona, cu no ta pertenece na e nucleo di lider consagra, ta un intento pa purba kita atencion for di e lider cu no kier bay un siguiente debate? Y si a logra esaki mes, kico por ta e beneficio pa e partido berde den e situacion actual. E pregunta ta kico pa haci den e situacion cu a surgi awor. Bay keha den medionan di comunicacion cu e partido a ser trata di manera inhusto? Esey lo ta e colmo. Un partido cu ta den gobierno, cu ta dispone (sin hustificacion) di tur e bentahanan gubernamental cu esey ta trece cu ne (acceso na placa y personal di gobierno), ta bay keha di ‘boycot’? Ban spera cu esey no sucede, pasobra esey si ta mundo riba su cabes.