Home Den Mi Cabes Cuminsa scoge bo batayanan of bo lo keda bringa pa semper

Cuminsa scoge bo batayanan of bo lo keda bringa pa semper

170

NG Yakari.jpg

Mi hendenan! Nos tey, disfrutando di vakantie riba un chill. Un poco mas cu un siman riba Aruba y tiki tiki mi ta cuminsa corda dicon ma bay bon leu. Hahahaha! No, cos serio. Mi stima e isla pero full Aruba merece ta un serie riba Netflix paso esta un drama.

 E parti mas dushi di ta na cas ta cu semper tin hende rond, e parti menos dushi ironicamente tambe ta cu semper tin hende rond. Ken mester Keeping up with the Kardashians si bo por djies Keep up cu tur e drama na Aruba? Mi mama su cas ta manera cas di pueblo. Eynan tur hende ta yega. Awe bo ta un stanhero cu a bin bishita e siguiente dia bo ta mi mama su di 100 yiu adoptivo. E pret ta cu unda tin hopi hende, semper tin hopi opinion pasobra cada cabes ta un mundo. E variedad di edad di hende cu frecuencia ta bin mi mama su cas ta pasa di un extremo pa otro y ami mey mey di e tempestad purbando di scucha un y tur. Tin esunnan chikito cu djies kier nan tablet, tin e mama cu ta djies duna e yiu un tablet y tin e wela cu ta rabia pasobra tablet ta existi.

Tin e mama cu e yiu gay, tin e yiu cu ta haya leuk cu e ta gay, tin esun cu tin cu menciona Dios cada biaha cu nan bisa e palabra gay. Tin esun cu left and right ta campaña pa Otmar.
Tin esun cu definitivamente no kier sa di Otmar pasobra ta Evelyn ta e cambio. Fuera di esey tin cabrito, pushi y cacho. Enfin, you get the point, tin te hasta un cabrito cu yama
Juanes mane ta artista Colombiano e ta. Hende gusta busca mi boca no, mi ta kere pa malo ora mi ta rond di nan, nan kier touch topiconan cu mi ta apasiona riba dje pa wak ki mi tin di bisa. Pero bosa, cu tempo bo ta egt siña scoge bo batayanan, bo ta siña kico ta bal la pena discuti y kico no. Bosnan cuenta cu tur boso theorianan y boso bestianan artista, no cansami.

Sinta na un bar cu un di mi amiganan un waiter ta bin pasa man den mi cabey.
Mi ta bise hopi netjes cu e no por haci esey pasobra e ta envadi mi privacidad, mi cabey ta un parti di mi curpa y e no por mishi sin mi permiso. Djei e ta bira wak e otro waiter cu ta bisa “Si, pero cu e cabey ey bo ta provoca”. Mi ta bolbe splica e cu aunke e ta provocante pa mishi cu mi cabey e mester puntra prome. Mi a bise cu e tin suerte cu mi ta lief, pasobra un dia e lo haya un cu no lo ta mes lief cu mi y dune e zundra cu e merece. El a bira e tema, cuminsa papia cu si cu cabey no ta importante, cu locual ta importante ta ken bo ta como persona bla bla bla. Despues el a egt cuminsa bira problematico y el a bisa “Suerte cu bo ta lief, paso imaginabo si bo tabata tin e cabey asina ey anto bo ta un muhe fresco”. Ma keda wak e den su cara, purbando di decifra kico e kiermen cu esey. Acaso muhenan cabey diferente ta debe mundo nan amabilidad?

A caso tin cabey cu no ta fit un standard social kiermen tur otro parti dimi si tin cu adapta? Despues cu el a nota mi desinteres el a cambia su tono. El a cuminsa bisa cu na Aruba e unico caminda cu e ta wak hende cu mi tipo di cabey ta na e bar ey. Y den mas cu un ocasion nan ta muchanan chikito. Hey, trankilo, mi ta papiando di un bar bandi lama cu ta family friendly. Pero bon, mi ta splice cu esey ta mas probablemente ta pasobra asina muhenan cabey afro yega un cierto edad, sociedad ta pone nan bou presion pa nan straight e. Djei el a sigui papia di cabey y hende den su famia cu ta mescla y ki tur sorto di cabey nan tin.

El a abstene di bisa palabranan manera “afro” of “crinchi” y na su luga e di “krul chikito chikito”. Mi a kinipi wowo cune y mi a keda keto. Yiu, mino tabay pasa henter mi bida ta discuti cabey cu hende. Un palabra word of advice mi hendenan, si bo wak un muhe cu cabey cu ta yama bo atencion, no mishi cune sin puntra. Mind your own business.