Home Deporte Club La Fama di Savaneta tambe a haya su miniturf

Club La Fama di Savaneta tambe a haya su miniturf

195

Muchanan tabata core contento ayera nochi riba e veld miniturf cu un rato prome a wordo inaugura cu sake di bala door di Prome Minister Mike Eman, e miembronan honorario Benny Geerman, Wim Diaz, Fermin Tromp, y presidente di SV La Fama Andres Garcia. E hobennan cu a actua pa portero tabata Shendel Fingal y Jeon Ras.

E proyecto aki cu ta un iniciativa di Prome Minister Mike Eman, pa construi mini canchanan deportivo den barionan, a wordo sigui pa Comite Olimpico Arubano.

Algun luna atras a keda anuncia cu ta bay realisa 6 mini cancha futbol rond Aruba cu patrocinio di e Programa Olympamerica di e Organisacion Deportivo Panamericano atrabes di Comite Olimpico Arubano bou presidencia di Sr. Roy Mezas. Enbes di uza e suma di placa pa un solo Proyecto grandi, Gobierno a haci apelacion pa laga mas tanto organisacion beneficia di e ayudo aki y tabata algo cu COA tabata di acuerdo cune sigur. Asina a bin construi 6 di e veldnan aki na Dakota, Arsenal, Ayo, La Fama, Washington y Estudiantes. FCCA tambe ta construyendo uno na Cura Cabay Zuid

Prome Minister Mike Eman a bisa den su discurso breve cu di e forma aki un biaha mas su Gobierno a cumpli cu Savaneta. A percura pa den diferente area di e districto aki pone luz y a asfalta cayanan. Awor nan a haya un bunita cancha di miniturf, cu sigur ta yuda pa crea hobennan sano.

Giovanni Croes, miembro di directiva di La Fama a expresa cu nan ta sinti nan mes super orguyoso y agradecido na Prome Minister Mike Eman cu a duna un vota di fabor pa nan bini na remarca pa e cancha aki cu ta creando hopi entusiasmo bou di mucha, hoben y hende grandi. “Awo ta padilanti so La Fama ta sigui bay cu e veld aki. Masha danki principalmente na COA y na Prome Minister Mike Eman.”

Presente tambe tabata Presidente di Parlamento Mervin Wyatt Ras, kende a duna su contribucion pa e cancha aki por a wordo realisa.