Home Local A bin cu ley cu ta afecta sector primario neglishando consehonan di...

A bin cu ley cu ta afecta sector primario neglishando consehonan di Santa Rosa

383

Departamento di Santa Rosa cu ta esun encarga cu e sector primario di agricultura, cria y pesca tambe a expresa su preocupacion pa e decision cu otro departamento di gobierno, esta departamento di Naturaleza y Medio Ambiente a bin cu ne.

E departamento aki a introduci un ley di proteccion di algun sorto di piscanan cu ta pone den peliger e sobrevivencia di e actividad artesanal aki cerca nos piscadonan local. Santa Rosa a yega di duna e departamento aki un serie di conseho contra e prohibicion, ya cu tin varios alternativa prome cu bin cu algo asina radical.

Directora di Santa Rosa, Nathaly Maduro a bisa cu di parti di e departamento aki, pero tambe formando parti di e directiva di e fundacion Centro di Pesca Hadicurari nan ta lamenta hopi con full e proceso di bin cu e ley di prohibicion di piscamento di un gran cantidad di especie di pisca a bay. Nan ta pisca cu nos ta consumi localmente. Te hasta piscanan manera Buni cu e piscadonan ta uza como as. Pues ta dificil cu e piscadonan por pisca sin as.  Pero e ley aki tin un embergadura mas grandi no solo pa e piscadonan sino entre otro pa e sector di criadonan di bestia.

Ley y consehonan
E ta aclaria cu e ley aki no ta cay directamente bou responsabilidad di Santa Rosa. Pero den varios oportunidad  nan a traha rapportnan pa conseha e departamento concerni cu naturaleza y medio ambiente pa bin cu otro forma pa loke ta trata cu e introduccion di un ley asina cu tin su impacto pa nos piscadonan y pa e sector primario aki.

Pero fei di augustus aña pasa, Sra. Maduro a laga sa cu el a pidi den nomber di e directiva di Centro di Pesca Hadicurari un reunion cu e director di departamento di Naturaleza y Medio Ambiente ariba rumor cu a cuminsa core riba e binimento di e ley controversial aki. Sinembargo e contesta cu el a haya fei di e director di e departamento aki tabata cu ‘e no ta traha riba rumornan’. Tambe el a laga sa cu e no ta bay atende e reunion aki. “Cu e no ta kere cu mester bin contesta niun di e preguntanan”, sra. Maduro ta bisa.

Nan a logra haya un reunion despues te hasta nan a reuni cu wardacosta. Pero e ta reconoce cu cada biaha cu nan a acerca departamento di Naturaleza y Medio Ambiente pa haya informacion tabata dificil pa nan por haya feedback. Pues e ta kere cu como departamento cu ta encarga cu sector di pesca, e lo tabata mas cu etico cu nan por a haya un copia di un concepto di e ley prome cu el a wordo firma.

Alternativanan
Ora Santa Rosa a bin controla tur nan rapportnan cu nan a yega di entrega na e departamento concerni nan ta ripara cu Santa Rosa ta papia di no bin cu prohibicion. Pero nan sugerencianan no a wordo tene na consideracion.

E ta haya cu prohibicion di piscamento riba tur sorto di pisca tin un impacto negativo riba e piscadonan. Eventualmente un alternativa prome di por papia di prohibicion lo ta bin cu un sistema di zonanan manera nan a yega di conseha nan. Sra. Maduro ta haya cu den un sistema di zonanan bo por tin un miho control.

Otro sugerencianan ta bin cu regulacion y no cu prohibicion riba piscamento. Tambe Santa Rosa ta haya importante prome cu un bin cu prohibicion cuminsa prome cu un campaña di conscientisacion pa asina e piscadonan por compronde pa kico e ley aki ta wordo introduci.

Santa Rosa haciendo uzo di nan experto riba bida marino lo bay haci un re capitulacion di tur nan rapportnan cu nan a yega di manda caba. Nan no ta perde speransa cu kisas ora cu bin un parlamento nobo y un gobierno nobo, cu nan lo por convence e minister concerni pa realisa cu e sector primario ta hopi mas importante di locual hende ta realisa. Entre otro garantisa e siguridad di cuminda pa nos habitantenan.

Otro sector afecta
E sector di pesca aki ta keda uno hopi importante ya cu nos ta papiando di e sector primario, sra. Maduro ta bisa. P’esey e ta haya cu e ley cu departamento di Naturaleza y Medio Ambiente a bin cune no solamente tin su impacto riba e area di pesca. Pero ainda ta falta full un lista di mata local cu no mag di kita mas. Tambe e ley ta mishi cu e criadonan, ya cu nan tambe ta bay tin cierto reto cu e ley aki pa motibo cu bo tin pa ehempel e criadonan cu tin e custumber di laga nan bestia cana los. “Bo a pasa un ley cu ta limita nan. Pero kico como gobierno nos ta bin cu un solucion pa nan.”