Home Local Awe reunion entre Reino y Venezuela riba situacion tenso

Awe reunion entre Reino y Venezuela riba situacion tenso

417

45 Arubano a logra di regresa te awor

Awe ta tuma luga un reunion di halto nivel gubernamental tanto di paisnan di Reino Hulandes como di gobierno di Venezuela pa atende e crisis cu e pais bisiña aki. E meta ta pa mehora e comunicacion y asina logra un solucion.

Ayera prome minister Evelyn Wever Croes a informa cu despues cu a wordo cumpli e 72 ora inicial, e gobierno di Venezuela a extende di forma unilateral y indefini e prohibicion di trafico aereo y maritimo for di su pais pa e islanan ABC.

Secretario di Estado di Hulanda encarga cu asuntonan di Reino, Raymond Knops a realisa su prome bishita oficial na e gobierno nobo di Aruba di gabinete Wever-Croes pa conhuntamente atende e situacion cu Venezuela. Pero tambe pa e mandatario Hulandes por ta na haltura di e retonan di nos gobierno riba tereno financiero y social. El a considera e reunion aki relevante pa atende debidamente e demanda di Venezuela pa bin cu e decision aki, ya cu nan ta sinti cu den canal oficial ta wordo papia un cos, pero den medionan di comunicacion ta wordo publica otro cos.

Evacuacion y reunion
Prome mandatario di Aruba a laga sa cu tur esfuerso a wordo haci pa evacua tur ciudadano Arubiano y Hulandes cu a keda pega na Venezuela ora cu e gobierno di presidente Maduro a bin cu e medida aki. Esfuerso diplomatico a wordo haci pa logra esaki y awe ta tuma luga e prome contacto personal.

Nan ta calcula un total di 180 ciudadano a keda pega na e pais bisiña. Entre nan minister Glenbert Croes cu a bay Venezuela pa asunto di salud. Mirando e actual situacion delicado na Venezuela, e prome minister ta conseha pa tur nos ciudadano pa abstene di biaha actualmente pa Venezuela, sino ta algo estrictamente necesario.

E conseho na nivel di Reino Hulandes pa abstene di biaha Venezuela ta keda vigente. E ta un codigo oraño cu ta restringi pa bo biaha na cierto sitio. Si bo bay Venezuela bo ta core cierto risico ya cu actualmente no tin un garantia pa bo siguridad y bienestar. Aunke gobierno lo purba di haya e garantia aki, pero nan no sa si lo por logra por lo pronto.

E echo cu gobierno di Aruba a dicidi di stop cualkier tipo di importacion di diferente metal manera koper, chumbo y aluminio for di Venezuela, cu tabata e argumento principal cu e gobierno di presidente Maduro a uza pa hustifica su embargo, a yuda pa alivia e tension den e relacion internacional aki. Ta asina cu for di diamars anochi y ayera den henter dia e vuelonan a reactiva y nos hendenan cu a keda pega na Venezuela a cuminsa bin Aruba bek, entre nan minister Croes cu mester a yega ayera tardi. “Nos no ta bay descansa te ora e ultimo pasahero cu ta pega yega”, segun e prome minister.

Prome minister di Aruba a bisa cu e echo di trece tur ciudadano bek ta trece un trankilidad, pero esaki no kiermen cu cos a caba ya cu nan no ta satisfecho y ‘nada contento con esaki a bay’. P’esey e ta considera e reunion di halto nivel gubernamental di awe hopi importante. Nan ta bay papia riba e certificacion cu lo wordo exigi na momento di importacion y den esaki autoridad Venezolano lo tin su participacion tambe, y ki otro producto ademas = nan kier restringi su salida. Ya cu pa e gobierno di Venezuela, Aruba ta e problema riba importacion di nan koper.

Igualmente minister di Asuntonan Economico, Xiomara Maduro, a informa cu tur importacion di koper y diferente otro metalnan pa Aruba a keda prohibi como un medida urgente pa atende cu e crisis cu a surgi cu Venezuela. Mirando cu e tabata un decision urgente, gobierno no a yega di reuni cu e compania (nan) local cu ta cumpra koper. Sinembargo e mandatario a laga sa cu e canal ta habri pa nan tuma contacto cu departamento di Asunto Economico pa nan haya sa mas di e contenido y alcance di e decision aki. Igualmente pa e importacion di fruta y berdura for di Venezuela cu ta wordo afecta nan ta spera cu esaki ta temporalmente.

 

Crisis na Venezuela y refugiadonan
Riba asunto di refugiado e ta haya cu Hulanda mester crea cierto compromiso manera nan a yega di haci cu e crisis di refugiado na Europa. El a indica cu e situacion di crisis humanitario cu e pueblo di Venezuela ta pasando aden ta dificil, y e ta un topico sumamente delicado ya cu ta trata di hendenan, y nos so como pais no por atende cu e asunto aki.

E ta haya cu e noticia ultimo cu un grupo di mas cu 30 hende a riesga nan bida den un boto chikito caminda varios di nan a muri pa bay Corsou, ta refleha esaki. El a expresa su preocupacion cu e tipo di situacion di refugiado lo sigui presenta ya cu Aruba tin su propio problemanan social y financiero pa atende cu nan. Pero di otro banda nos pais si ta comprometi ya cu pais Aruba a firma un tratado pa atende cu asunto di refugiadonan.

P’esey e ta kere cu Hulanda mester tin un participacion mas activo pa atende cu un eventual caso masivo di refugiadonan Venezuela. El a indica cu den pasado refugiadonan a wordo aloca den otro paisnan mas grandi cu mester di nan pa nan propio desaroyo. El a compronde cu tin pais na Latino America cu a cuminsa tuma nan. Pasobra e ta haya cu Aruba no mester ta e unico pais cu mester habri su frontera pa yuda esun den necesidad. Pero den e situacion cu Aruba ta actualmente cu e presion social, nos pais casi no ta den posicion pa saca un brasa pa yuda otro. Nan ta preparando un plan pa wak con Aruba ta bay atende cu esaki, ya cu nos pais ta parti di un tratado internacional cu casi ta impedi Aruba pa nenga refugiadonan bin, asina e prome minister a splica.