Home Editorial AVP ainda den lamento pa coalicion cu MEP

AVP ainda den lamento pa coalicion cu MEP

1402

E atracado kier bin yuda e victima?

Ainda AVP ta boga pa un coalicion amplio MEP/AVP, na luga di e coalicion naciendo entre MEP, POR y eventualmente RED. Den e reunion di prensa di ayera di e trio cu aparentemente mester reemplasa e lider perdi den accion, banda di un tono combativo tabatin uno tambe di lamento cu e partido mas grandi den voto no por participa den gobernacion. Y ta keda maha riba e tema di un coalicion amplio cu partido MEP, cu no ta un gepasseerd station so, sino cu nunca tabata un opcion pa considera. Y pakico no?

No solamente pa e pasado unda cu un MEP un tiki naief e tempo ey a pasa mal rato na man di AVP, tumbando nan mes gobierno, pa bay busca salbacion pa un situacion financiero, cu no ta ni remotamente asina espantoso manera loke nos tin awor. Pues in hindsight hamas e tempo aya MEP mester a sikiera considera un coalicion asina, pasobra e situacion di e tempo ey no tabata exigi esey. Ta bao presion fuerte di Hulanda a haci esaki, en vista tambe di e problemanan di corupcion (caso Beta) causa pa hende liga na e partido berde, cu gobierno di MEP a haya pa resolve. A dura hopi aña, te tempo cu MEP a bolbe den gobierno na 2001, cu e settlement cu SACE a tuma luga, pa por clausura e periodo tristo ey.

E wega cu AVP a hunga e tempo ey, y e gobierno di AVP/OLA cu a goberna despues, tabata prueba palpable cu no tabatin mester di un gabinete amplio pa por goberna. Esaki ta sigur un di e lesnan mas duro cu partido MEP a yega di haya, y ta obvio cu nan no mester di ningun hende corda nan riba esey. Pero esey no ta e unico motivacion pa rechasa e ponencia di awe di partido AVP, cu realmente esey lo ta un bon opcion. Laga nos analisa manehando algun pregunta clave. Si AVP ta kere cu esaki ta e momento corecto pa bin cu un coalicion MEP/AVP, kico ta e situacion di urgencia nacional, cu ta hustifica esaki? Lo ta algo sumamente serio mester ta tumando luga, pa hustifica un gabinete nacional asina… Pero no ta e mesun AVP, cu ta bin e siman aki cu critica pisa riba e partidonan MEP y POR, cu a sali comentando riba e carta di director di  Financia, cu ta indica un deficit grandi pa atende na aña 2018?

Si no tin un situacion dificil, anto no tin pakico considera un gabinete amplio, y un coalicion basa riba 11 o 12 asiento ta factibel, si e partidonan ta dispuesto y ta mira un manera pa combina nan programanan pa elabora un plan di gobernacion rasonabel, punto.  E situacion financiero de hecho ta mas grave cu AVP ta pretende, pero no asina grave cu e ta rekeri un gabinete amplio. Y ademas, si ta asina malo e situacion financiero ta cu tal gobierno lo mester maneha e pais, anto ta miho pa instala un zakenkabinet y laga nan atende e situacion di emergencia ey. Pero na e momento aki no ta mas cu logico cu un gobierno di coalicion, apoya pa un mayoria chikito, ta asumi responsabilidad pa coregi e rumbo cu Aruba ta aden, resolve e problema momentaneo di presupuesto, y cuminsa atende recuperacion economico como prioridad, pasobra loke Aruba mester urgentemente ta atende e situacon economico, hustamente pa evita cu e adaptacionnan financiero di gobierno lo mester bin di austeridad.

Y den e buskeda di prosperidad aki ta aparece un par di nubia scur na horizonte. E prome ta e situacion di e refineria, cu den campaña no a hunga un papel mayor, pasobra tabata conveniente pa tur pa no toca e tema ey. Mientras tanto e companianan madre ta den problema serio, tanto PDVSA como Citgo, cu nada substancial ta sucediendo na Aruba, unda e sospecho ta cu e placa cu e compania FMSA ta gana den economia di Aruba, ta financiando e pantaya di propaganda cu mester mantene e idea cu nos lo mira un upgrader talvez cuminsa opera na fin di otro aña. Ken sa den ki situacion Venezuela lo ta pa e tempo ey, pa hustifica algun optimismo tocante e proyecto aki. No pasobra nos ta anhela mira e proyecto bira realidad; ta bon imaginabel un Aruba sin refineria, pero na nivel politico tabatin y tin ainda un apoyo grandi pa esaki, y esey ta decisivo, te ainda. En todo caso, pa cuminsa sali for di e impasse economico di e momento aki, no por conta cu e aporte di e sector aki.

Y pa bolbe na e asunto di e dos partidonan grandi goberna hunto: tin un motibo cu e partido berde kier lubida pero e ciudadano consciente no. Esey ta cu nos a caba di haya caida di e gobierno mas delincuente di nos historia. Ta logico anto cu mester bin un otro gobierno, pa por tin sikiera un oportunidad di haci e limpiesa cu mester tuma luga den gobernacion. Den comparacion: bo por laga e atracado bay atende e victima? P’esey mester otro man na e timon.