Home Regional Aumento preocupante di asesinato na Trinidad & Tobago

Aumento preocupante di asesinato na Trinidad & Tobago

307

Port of Spain – Cu 16 persona asesina den e prome cuatro dia di december 2017, hefenan di polis na Trinidad y Tobago ta buscando otro strategia pa mehora nan intervencion den e situacion.

E total di asesinato a yega 460 pa e aña te awor. Den ultimo dos dia tabatin tambe dos doble asesinato na Belmont y Morvant, completando asina 24 asesinato doble pa e aña.

E cifranan no ta cay bon cerca Acting Commissioner of Police (ACP)di Anti-Crime Operations, Irwin Hackshaw. Papiando cu T&T Guardian, Hackshaw a bisa cu tin preocupacion mayor entre e top di cuerpo policial di e pais, incluyendo e alto comisario interino, Stephen Williams.

“Nos no ta nada contento… nos no ta comodo cu loke ta pasando,” Hackshaw a bisa, notando cu nan ta especialmente molestia pa e reciente aumento den asesinato.

El a declara cu nan ta buscando forma pa pone mas polis disponible den e comunidadnan den henter e pais, pa por trece mas elemento criminal pa responde dilanti husticia.

“Nos ta implementando diferente strategia y buscando diferente manera pa pone mas oficial den areanan strategico pa haya mas gara riba conducta criminal.”

Trinidad & Tobago cu 1.365.000 habitante y un cantidad di 460 asesinato, cu por yega 500 pa fin di aña, ta alcansa un ‘murder rate’ di alrededor di 37 asesinato pa cada 100.000 habitante. Cu esey nan ta acercando e top di e lista den Caribe, cu ta US Virgin Islands (39 pa 100.00 habitante) y Saint Kitts & Nevis (38 pa 100.000), cu ta mas halto cu paisnan manera Guatemala y Colombia cu ta sigui cerca.