Home Regional Argentina tin tres biaha mas prizon pero no ta suficiente

Argentina tin tres biaha mas prizon pero no ta suficiente

12

Argentina tin cada bes mas preso, pero no ta parce suficiente. Cada crimen tin como respuesta di e medionan di comunicacion mas exigencia di man duro, mientras entre hende ta crece e idea cu “e delincuentenan ta drenta pa un porta y ta sali pa otro.” Sin embargo, e ultimo estadisticanan ta contradeci e sentimento ey. Na fin di 2015, e personanan deteni den prizon federal y provincial tabata suma 72.693, casi 190% mas cu na 1996, tempo cu nan tabata 25.163. E tempo ey e poblacion total Argentino a crece como 22%. Na 2016 y 2017 e cantidad a bolbe crece, segun e cifranan presenta siman pasa pa Procuracion Penitenciario di Nacion.

E cantidad di prizon no ta yega, cu caso dramatico manera provincia di Buenos Aires, unda 33.000 detenido ta biba den e espacio destina na 26.000.Gobierno di Mauricio Macri a anuncia e siman aki un plan pa aumenta cu 726 cama. Cu un cifra di 168 preso pa cada 10.000 habitante, Argentina ta ocupa e di shete luga den e ranking di pais di G20, riba un podio cu Merca, China y Brasil ta lidera. Pero diferente cu e tendencia mundial, unda e tasa ta baha aña tras aña, e pais Suramericano ta sigui aumentando. Den e cuadro aki, Congreso ta discuti un ley cu lo limita e salidanan transitorio y e libertad anticipa  pa un lista largo di delito.

Pa e criticonan di e proyecto, e debate mester tene cuenta cu si e idea ta pa tin mas tempo pa e condenadonan den e prizonnan, lo mester tin mas luga, cu awe caba ta insuficiente pa satisface e demanda. “Awor caba tin ‘bottleneck’, e sistema federal ta al borde di colapso, igual den e provincianan”, Carlos Motto ta bisa, integrante di e departamento di investigacion di Procuracion Penitenciario. E problema, e ta argumenta, ta cu tin un aumento di e cantidad di  detenido, un fenomeno cu a acelera desde 2008. “Tin un politica di retene y no duna salida transitorio y libertad condicional na e presonan. E prizon ta retene mas y tambe nos ta registra un aumento di captura, pasobra polis riba caya ta aumenta,”  Motto ta bisa. “Otro punto ta cu e caracteristica di e hendenan cu ta keda preso pa mas tempo ta, cu esnan cu tin menos capacidad pa defende nan mes, ta esnan mas pober. Loke nos  a desea di destaca den e informe ta cu e aumento di e poblacion encarcela no ta un fenomeno mundial. Argentina a crece 24% desde 2008, pero Mexico a cay (-6%), mescos cu ta pasa na Merca (-14%) o Rusia (-28%),”el a  splica.