Home Local Area pabou di ex waf di container mester keda conserva pa gobierno

Area pabou di ex waf di container mester keda conserva pa gobierno

816

E ciudadano Jacobo Gavidia, kende ta un ex empleado di APA y actualmente a baha cu pension, ta expresa su preocupacion cu e proyecto cu ta biniendo den e area di waf. E ta specificamente e area di ex waf di barconan di carga y container. E plan aki ta inclui e area pega cu ex- Bushiri hotel tambe.

E ta full un plan di desaroyo urbanistico conoci como “Port City” di cual e compania Oever&Zaaler (OZ) Architects a traha un master plan di henter e proyecto cu lo tuma entre 10 pa 20 aña di ehecucion. Por cierto e master plan aki a keda presenta recientemente pa Lex Ridder kende ta Chief Commercial Officer di APA, durante e Cruise Symposium Aruba 2017, organisa pa Oficina di Turismo Aruba (ATA), diahuebs ultimo.

 

Conserva ex waf di container
Segun e master plan lo tuma luga e implementacion gradual di asignacion di parcela y construccion di particion anual di aproximadamente 10 mil meter cuadra (GFS). Sr. Gavidia a declara cu e maneho aki mester ta uno di hopi cuidao y bon planificacion, pasobra sigur mayoria di e inversionistanan nan kier e miho alocacion.

Cuidao cu bo lo bay duna nan net pabou di waf container”, el a bisa. El a expresa su preocupacion cu si e area aki ta wordo entrega bo ta condena e waf. E area ey net pabou di e waf di container mester wordo conserva totalmente pa gobierno. Igualmente lama dilanti mester keda safe pa trafico maritimo y prohibi pa tur actividad acuatico, incluso pa botonan personal. Esaki pa motibo di e siguridad di trafico maritimo y e maniobra di e barconan ora nan drenta e canal pa drenta waf.

E ta haya cu den futuro ora cu nos kier expande nos waf pa haya mas barco di turismo, lo tin espacio pa expande y bay te Bushiri, ya cu e luga aki ta adecuado pa den futuro bin cu un expansion pa mas barco crucero of mega yate y ta importante pa e keda reserva pa gobierno. “Nos no sa kico lo por pasa aki 20 pa 30 aña”.

E ta haya cu nos tin wak un poco mas dilanti. Si nos ta entrega e area strategico aki no tin mas espacio den nos waf di Oranjestad pa sigui expande. “Basta reserva e pida tereno di container bay te abou di Bushiri. Reserve!”. E area ey lo duna espacio pa aloca dos crucero grandi di 363 meter. Esaki ta e grandura maximo cu e tipo crucero aki por bira, ya cu den Caribe mester waf pa nan tambe. Te hasta si lo extende un tiki e area aki, nan por aloca dos barco grandi y un chikito (menos cu 300 meter) of tambe tres pa cuater barco di 300 meter.

Conocemento y experiencia
Sr. Gavidia a traha mas cu 30 aña como loods na servicio di APA na waf di Playa, Barcadera y San Nicolas. A base di su conocemento y experiencia el a yega di presenta un conseho riba e proyecto di e waf di Barcadera cu a wordo practicamente neglisha. Aunke cu e waf aki conoci como Barcadera Multi-Cargo Sea Terminal cu su apertura oficial a tuma luga 30 di maart 2016, ta un realidad, pero Sr. Gavidia ta haya cu e proyecto aki a costa por lo menos cinco biaha mas cu e tempo cu inicialmente nan a traha riba e plan di e waf di Barcadera na 1977, unda el a forma parti di dje.

El a trece como ehempel CPA na Corsou a yega di organisa un seminario/tayer di Dynamci Mooring y Motoceanic Analisis pa e dos pier pa mega crucero. E meta tabata pa e compania aki averigua datonan a base di feedback di esunnan cu a labora riba piernan, botonan di tou y loods. Nan tabata mas tanto un seminario di inclusion y no di exclusion. Despues tur e datonan compila a testnan nan den simulacion via computer pa wak si nan ta cuadra cu e condicionnan di bida real. Pero na Aruba aparentemente ta net contrario, caminda experiencia y conocemento di esunnan cu a labora pa decadanan riba pier no ta wordo teni na cuenta pa nada.

Mas informacion y transparencia
Un biaha mas Sr. Gavidia ta trece dilanti su experticio, ya cu el a tuma nota di henter e papiamento cu tin rond di e plan di desaroyo urbano conoci como “Port City” na Oranjestad. E ta haya cu ta bon pa henter pueblo por tin acceso riba e master plan aki, ya cu hopi cos ta wordo papia tocante e proyecto aki. Ta bon pa tur hende sa -specialmente esunnan cu tin experiencia y conocemento riba e tereno aki- con e tereno di waf lo wordo desaroya. Asina tur hende lo por mira y duna un opinion completo riba e patrimonio aki.

Tambe el a indica cu inicialmente nan kier asigna e waf di Oranjestad solamente pa barco crucero. Pero aworaki cu a tuma luga e mudamento di e waf di container pa Barcadera y full e area ey a bira liber, nan kier bin cu un compleho di edificionan entre otro pa actividad comercial.

Entre loke e por a tende rond di e mega proyecto aki ta entre otro cu lo bin facilidadnan, infrastructura y recreo pa e trafico di turista riba propiedad di waf. Tambe cu no lo bin mas cu hotel sino cu e turistanan y local por haci uzo di e beach publico riba tereno parti west di ex Bushiri hotel. Igualmente cu nan lo conecta e facilidadnan aki cu Linear park pa esaki wordo uza pa recreo publico.

Sr. Gavidia a laga sa cu caminda e punta di Bushiri t’ey, nan no ta yame Punta Brabo por nada. E ta haya cu dificilmente nan por traha un beach eynan. “Tempo di ex Bushiri hotel a wordo traha un sorto di beach artificial pa e turistanan, pero pa e santo keda nan a pone dos sorto di pier pasobra ora un biento di abou bini, e ta laba tur cos bay cu ne”, el a bisa.

Segun Sr. Gavidia ora bo yega unda e waya di APA ta caba, bo ta mira hopi piedra chikito preto. Bo ta puntra bo mes, fei unda e piedranan aki ta bin? E ta splica cu e biento di abou ta keda coba abou keto bay y asina aki nos por mira e piedranan aki cu t’ey for di tempo cu e contratistanan cu a traha e waf a basha nan eynan. Tur esaki ta mustra nos bon cu no mester subestima e condicion natural di nos bientonan y lama. “Un beach dilanti di Bushiri no por!”, el a bisa. E area pabou di Bushiri ta un area ideal pa desaroye completo te Tamarijn.

E no ta kere cu mester traha un playa riba tereno di waf cu a wordo traha y condiciona caba pa trafico maritimo, mientras cu pabou di ex Bushiri hotel tin un luga masha grandi cu solamente mester condiciona bon pa bira un area grandi pa publico.