Home Regional Acuerdo gobierno Hulandes nobo ta enfoca riba colaboracion, integridad y Venezuela

Acuerdo gobierno Hulandes nobo ta enfoca riba colaboracion, integridad y Venezuela

808

E coalicion nobo di Hulanda VVD, CDA, D66 y ChristenUnie a cera un acuerdo pa goberna. Den esaki nan tin un capitulo tambe dedica na Reino unda nan ta enfoca riba un colaboracion mas estrecho cu e islanan Caribense, integridad y bon gobernacion y e crisis na Venezuela.

Esaki nos partner den noticia Ret Karibense ta informa. Den e acuerdo nan no ta menciona e reconstruccion di St. Maarten. E partidonan a delibera 7 luna riba e acuerdo y a presenta esaki ayera den Tweede Kamer.

Integridad
E coalicion nobo ta mustra tambe riba e posibilidad pa interveni den gobernacion di e islanan. E relacion den Reino ta trece responsabilidad cu ne, asina e acuerdo ta menciona. Siguramente si ta trata di garantisa integridad di gobernacion, derechonan y control di frontera riba e islanan. E conseho di ministernan di Reino lo supervisa riba esaki a base di e Statuut.

Segun e acuerdo integridad ta un prioridad pa Aruba, Corsou, St. Maarten y tambe Boneiro, Saba y St. Eustatius. E coalicion nobo ta mustra cu nan ta dispuesto pa inverti mas placa den e islanan pero bou condicion di bon gobernacion y un nivel adecua di responsabilidad financiero.

Colaboracion y Venezuela
Hulanda kier traha mas hunto cu e islanan autonomo, esta Aruba, Corsou y St. Maarten, e coalicion nobo ta bisa den nan acuerdo di gobernacion. E colaboracion ta necesario y mester haci esaki den un forma ‘constructivo’. Siguramente pa motibo di e crisis na Venezuela cu ta toca e islanan di ABC y asina tambe Hulanda. “E situacion politico insigur den algun paisnan ruman na Sur America ta haci e colaboracion mas necesario.”

E coalicion tambe kier traha mas estrecho cu e region Caribense en general y cu Union Europeo y organisacionnan internacional pa desaroyo e relacionnan den Reino miho. Fin di november lo planea probablemente un debate special riba e plannan di e coalicion nobo pa e parti Caribense Hulandes, momento cu e gabinete Rutte III nobo lo ta instala.


Mas placa pa kustwacht
Asina e coalicion nobo lo reserva mas placa pa combati migracion ilegal y transportacion di droga ilegal. Hulanda lo inverti anualmente 10 miyon euro den kustwacht Caribense, cual ta 2 miyon euro mas cu e gabinete a presupuesta inicialmente. Sinembargo esey no ta suficiente pa mantencion atrasa y pa cumpra material nobo. “E parti Hulandes di e presupuesto di kustwacht ta bay pa ministerio d Defensa y asina por wordo adapta pa logra di cumpli cu e tareanan di kustwacht necesario”, asina e coalicion nobo ta indica.

Combati pobresa Boneiro, Saba, St. Eustatius
E coalicion nobo ta priminti pa combati pobresa riba e islanan BES y asina e ministerio di Asuntonan Interno y di Reino lo haya un rol mas grandi pa e islanan aki.

Nada di reconstruccion di St. Maarten
Manera menciona ariba den e acuerdo di e gobernacion nobo di Hulanda no ta para nada specifico di St. Maarten y/of un fondo di ayudo pa e reconstruccion di e isla afecta. Hulanda kier cu e placa disponibel pa esaki lo no bay directamente pa St. Maarten pero cu Hulanda y e paisnan autonomo den Reino lo supervisa unda e placa ta bay. Esaki ta algo controversial como cu St. Maarten tambe ta un pais autonomo den Reino cu tin su parlamento y gobierno cu ta dirigi e pais. Diabierna awor representantenan di St. Maarten, Aruba y Corsou lo bini hunto den constelacion di conseho di ministernan di Reino na Den Haag. Unda hunto cu prome minister Mark Rutte y e otro ministernan Hulandes nan lo tuma un decision riba e fondo.

E acuerdo di gobernacion nobo di Hulanda ta contene 55 pagina y riba pagina 8 por haya 3 alinea riba e parti Caribense.